Chalinze yang'ara Kitaaluma Mkoani Pwani

Imewekwa: March 6th, 2020

Halmashauri ya wilaya ya Chalinze,mkoani Pwani imeonekana kufanya vizuri katika matokeo ya darasa la saba kimkoa kwa mwaka 2019.

Mafanikio hayo yamebainika jana katika kikao cha wadau wa Elimu Mkoa wa Pwani kilichofanyika katika ukumbi wa ofisi ya Mkuu wa Mkoa. Kikao hicho kilihudhuriwa na maafisa Elimu wilaya,maafisa Elimu Taaluma,maafisa Elimu Vifaa na Takwimu ,waalimu na wadau mbalimbali wa  Elimu mkoani Pwani.

 Kikao hicho cha wadau wa Elimu kiliongozwa na Mkuu wa Mkoa wa Pwani Mhandisi Evarist Ndikilo. Katika kikao hicho kulifanyika tathmini ya mafanikio ya Elimu kwa kujadili changamoto zinazoikabili sekta ya Elimu mkoani Pwani na kubainisha mafanikio yaliyopatikana kwa kubadilishana uzoefu baina ya viongozi wa halmashauri za mkoa wa Pwani.

Katika hotuba yake Mgeni rasmi katika kikao cha wadau wa Elimu,Mkuu wa Mkoa alizipongeza halmashauri za mkoa wa Pwani kwa jitihada zinazofanywa na walimu mkoani Pwani katika kuinua kiwango cha ufaulu na kuwataka walimu kufanya kazi kwa bidii kama zilivyo sheria taratibu na kanuni za nchi.

Aidha katika tathmini hiyo Halmashauri ya Chalinze imeweza kuingiza shule mbili katika shule kumi bora kimkoa kwa maana ya shule za serikali na binafsi. Kwa shule za serikali pekee chalinze imeweza kuingiza shule tatu zilizoingia katika shule kumi bora shule hizo ni Kibiki,Mdaula B na Tukamisasa.

Kwa upande wa wanafunzi 10 bora wasichana kimkoa Chalinze imeweza kuingiza wanafunzi 8 kwa maana kuanzia wa kwanza hadi wa nane. Kwa upande wa wanafunzi kumi bora wavulana Chalinze iliingiza wanafunzi wanne.

Hivyo kwa tathmini hiyo, halmashauri ya Chalinze ilionekana kung'ara ukilinganisha na halmashauri zingine za mkoa wa Pwani.

Hata hivyo Mshindi wa kwanza kimkoa ni shule  ya Chalinze Modern Islamic kutoka Halmashauri ya Chalinze,shule hii imetunukiwa nishani ya ushindi na Mkuu wa Mkoa wa Pwani Mhandisi Evarist Ndikilo.