Kamati ya Elimu Afya na Maji Halmashauri ya Wilaya ya Chalinze yafanya ziara ya ukaguzi wa miradi ya maendeleo

Imewekwa: October 3rd, 2019

Kamati ya Elimu Afya na Maji katika halmashauri ya wilaya ya Chalinze ilifanya ziara ya ukaguzi wa miradi ya maendeleo jana katika shule za sekondari za Msata,Moreto,na katika kijiji cha Chamakweza katika ziara hiyo iliyoongozwa na mwenyekiti wa kamati hiyo Mheshimiwa Malota Hussein Kwagga ambaye pia ni diwani wa kata ya Kiwangwa. Kamati ilikagua mradi wa utengenezaji madawati katika shule ya sekondari Msata na kukagua ukarabati wa bweni katika shule ya sekondari Moreto lililoungua moto.

Aidha katika ziara hiyo wajumbe walikagua na kuona Mradi wa Bwawa la Maji ya kunyweshea mifugo katika kijiji cha Chamakeza na kuona uendelevu wa mradi huo, ambao ni mradi uliozinduliwa na mbio za Mwenge wa Uhuru mwaka huu.

Katika ziara hiyo ambayo ni ziara ya kwanza kwa mwaka wa fedha 2019/2020. Wajumbe wa kamati wameona ununuzi wa madawati 80 yenye thamani ya fedha za kitanzania milioni 6.4 ambazo zimetolewa na mfuko wa maendeleo wa jimbo la Chalinze,wamekagua ukarabati wa bweni la wavulana katika shule ya sekondari Moreto lililoungua moto na limekarabatiwa kwa fedha za kitanzania milioni 3.5 ambazo zimetolewa na halmashauri kutokana na mapato ya ndani ya halmashauri.Hivyo kamati hiyo imekagua miradi yenye thamani ya fedha za kitanzania milioni 9.9.

Katika ziara hiyo wajumbe wa kamati ya Elimu Afya na Maji wamempongeza mwenyekiti wa mfuko wa jimbo Mheshimiwa Ridhiwani Kikwete kwa juhudi anazozifanya kwa kushirikiana na madiwani wa halmashauri ya Chalinze.