Shule Kumi Bora zatunukiwa Vyeti Chalinze

Imewekwa: March 3rd, 2020

Halmashauri ya Wilaya ya Chalinze mkoani Pwani leo imezitunuku vyeti shule zipatazo 20 zilizofanya vizuri katika matokeo ya darasa la Saba na la nne kitaifa kwa mwaka 2019, na kuwa miongoni mwa shule kumi bora kwa ufaulu.

Hafla ya kutoa tunu hizo imefanyika katika ukumbi wa halmashauri ya wilaya ya Chalinze na kushuhudiwa na Madiwani wa halmashauri hiyo, kabla ya kuanza kwa mkutano wa Baraza la Madiwani unaoendelea leo katika halmashauri ya Chalinze.

Mgeni rasmi katika hafla ya kutoa tunu hizo alikuwa ni Mwenyekiti wa halmashauri ya Chalinze Mheshimiwa Saidi Zikatimu. Zikatimu amewatunuku Walimu wakuu wa shule hizo kama ishara ya ufanisi wa shule hizo.

Kwa mujibu wa Afisa Elimu Msingi Bi Zainabu Juma Makwinya alizitaja shule zilizofanya vizuri katika mitihani hiyo kwa kuanza darasa la nne kuwa ni; Chalinze Modern Islamic Seminary,Berachah Valley,Magome,St. Alphonso,Pakistani Mtete,Mustlead,Pingo,Bomani na Sirajul Munir Kiwangwa.

Kwa upande wa darasa la Saba,shule kumi bora zilizotunukiwa vyeti ni Chalinze Modern Islamic,Honest, Sirajul Munir Kiwangwa,Ndossam,Kibiki,Mdaula "B",Tukamisasa,Matuli,Ubenazomozi na Saadani Chumvi.

Mgeni rasmi katika hotuba yake ya kutunuku vyeti alizipongeza shule zote zilizoibuka kidedea na kuwapongeza Walimu na wanafunzi kwa kutekeleza wajibu wao katika suala zima la kitaaluma na kuzitaka shule zingine ziongeze bidii katika suala zima la Elimu na kuinua ufaulu ili taifa liweze kupata wataalamu mbalimbali wa kulitumikia Taifa.

Naye Mkurugenzi Mtendaji wa Halmashauri ya Chalinze Bi Amina Kiwanuka ametaka uwepo ushirikiano kati ya wazazi,walimu na wanafunzi katika suala zima la kujifunza ili tuwe na matokeo yenye tija katika halmashauri yetu na hatimaye Halmashauri kuwa katika nafasi bora kimkoa na kitaifa.

Aidha hafla ya kuzipongeza shule bora katika halmashauri zilishuhudiwa na Mbunge wa Jimbo la Chalinze Mheshimiwa Ridhiwani Kikwete, pamoja na wananchi waliokaribishwa katika mkutano wa Baraza la Madiwani.

Mheshimiwa Ridhiwani Kikwete aliwapongeza walimu wote jimboni Chalinze kwa kufanya kazi kwa moyo mmoja na kuwawezesha wanafunzi kufaulu kwa kiwango hicho na kutoa wito kwa walimu wote jimboni Chalinze kuwa na moyo wa kizalendo katika kuunga juhudi za serikali ya awamu ya tano kwa kutoa Elimu pasipo malipo.