Afisa Mwandikishaji wa Jimbo la Chalinze Afungua mafunzo ya waandikishaji

Imewekwa: May 15th, 2025

AFISA MWANDIKISHAJI WA JIMBO LA CHALINZE AFUNGUA MAFUNZO YA WAANDIKISHAJI

Afisa Mwandikishaji wa Jimbo la Chalinze, Bwana Ramadhani Possi, leo amefungua rasmi mafunzo ya watendaji wa kata kuhusu zoezi la uboreshaji wa Daftari la Kudumu la Wapiga Kura. Mafunzo hayo yanafanyika katika Ukumbi wa Mikutano wa Jakaya Kikwete na yamelenga kuwaandaa watendaji hao kwa kazi ya uandikishaji itakayodumu kwa siku saba mfululizo kuanzia Ijumaa, tarehe 16 Mei hadi 22 Mei 2025.

Akizungumza wakati wa ufunguzi wa mafunzo hayo, Bwana Possi amewataka waandikishaji kufanya kazi hiyo kwa kuzingatia sheria, taratibu na kanuni za uchaguzi. Amesisitiza kuwa uandikishaji ni kazi nyeti inayohitaji uadilifu, uwajibikaji na ufuatiliaji wa maelekezo yote yanayotolewa na Tume ya Taifa ya Uchaguzi.

Bwana Possi amewahimiza wananchi kujitokeza kwa wingi kushiriki katika zoezi hili muhimu, hususan wale ambao hawakupata nafasi ya kujiandikisha katika awamu zilizopita. Amesema huu ni wakati wa kila Mtanzania kutumia haki yake ya kikatiba kwa kuhakikisha amejiandikisha ili aweze kushiriki uchaguzi wa viongozi anaowataka.

Aidha, Afisa Mwandikishaji huyo ametoa wito kwa wananchi waliojiandikisha tayari kufika katika vituo vyao kuhakiki taarifa zao, na pale zitakapokuwa na makosa, wafanye marekebisho ili taarifa zao ziwe sahihi kwenye daftari.

Kabla ya kuanza mafunzo yao, waandikishaji wote wa ngazi ya kata walikula kiapo cha utii pamoja na kiapo cha kujiondoa katika uanachama wa vyama vya siasa, kama inavyoelekezwa na sheria na maadili ya uchaguzi, ili kuhakikisha kuwa wanatekeleza majukumu yao kwa weledi na bila upendeleo.