Baraza la Madiwani robo ya pili 2022/2023 lafanyika

Imewekwa: February 17th, 2023

Mkutano wa Baraza la madiwani,halmashauri ya wilaya ya Chalinze kwa robo ya pili kwa mwaka 2022/2023 limefanyika leo katika ukumbi wa mikutano wa Jakaa Kikwete na kuhudhuriwa na wananchi kama wasikilizaji.

Katika mkutano huo Mheshimiwa Nassa Karama aliweza kuuliza swali la papo kwa papo. Swali hilo lilenga kufahamu mwenendo wa ujenzi wa kituo cha mabasi kinachoendelea kujengwa katika halmashauri ya Chalinze.

Akijibu swali hilo Mkurugenzi Mtendaji,Bwana Possi alieleza kuwa ujenzi wa kituo cha mabasi unaoendelea ni ujenzi unafadhiliwa na wakala wa barabara nchini,ni ujenzi uliokusudiwa kujengwa kwa kiwango cha zege lakini kutokana na ufinyu wa bajeti ujenzi utajengwa kwa kiwango cha lami,lakini eneo la kuingilia na kutokea mabasi utajengwa kwa kiwango cha zege.

Aidha baada ya kipindi cha maswali na majibu wenyeviti wa kamati za kudumu waliwasilisha taarifa zao za utekelezaji wa shughuli na miradi mbalimbali ya maendeleo kwa robo ya pili kwa mwaka 2022/2023 na kupokelewa na baraza la madiwani.

Taarifa zilizowasilishwa katika baraza hilo ni kamati ya fedha uongozi na mipango,kamati ya afya, elimu na maji,kamati ya uchumi,ujenzi,na mazingira na kamati ya kupambana na UKIMWI. Baada ya wenyeviti wa kamati kuwasilisha taarifa hizo,Mwenyekiti wa Mkutano huo aliwahoji wajumbe kama wanakubaliana taarifa hizo kwa kila kamati wajumbe waliafiki na kuzipokea kwa kauli moja.