Baraza la Mamlaka ya Mji Mdogo Chalinze lakutana

Imewekwa: November 25th, 2020

 Mamlaka ya mji mdogo Halmashauri ya Wilaya ya Chalinze leo siku ya Tarehe 25/11/2020 imekaa kikao chake cha baraza cha kwanza cha robo ya kwanza katika ukumbi wa Halmashauri ya Chalinze.

Kikao hicho cha baraza cha mamlaka mji mdogo kilikuwa na lengo la kupokea na kujadili taarifa za kamati mbalimbali kwa lengo la kuona jinsi Mji mdogo Chalinze ukipiga hatua kimaendeleo.

Mwenyekiti wa Baraza hilo la Mamlaka Bw Rashid Sadala Maisha amezitaja na kuzipongeza kamati zote kwa kufanya kazi zao kwa weredi na kuwasihi kuchapa kazi.

“ Mamlaka ya Mji ina kamati zake tatu ambazo ni Kamati ya Afya, Maji  na Elimu, Kamati ya Uchumi,Ujenzi na Mazingira pamoja na kamati ya Fedha uongozi na Mipango. Kamati zote hizi nazipongeza sana kwa kufanya kazi zake kwa weredi pia nawasihi kuendelea kufanya kazi kwa bidii ili kutatua changamoto zinazowakabili wananchi ”. Bw Rashid Sadala.

Kaimu Mtendaji wa Mamlaka Bw: John Mlyambate amewahimiza wajumbe pamoja na wataalamu kuwa na ushirikiano ili kufanya kazi kwa Ufanisi.

“ Ninawaomba Waheshimiwa wajumbe tuwe na Ushirikiano baina yetu pamoja na wataalamu kwani kufanya hivi kutasaidia kufanya kazi yenye tija kwa jamii tunayoiongoza na Taifa  kwa ujumla”. John Mlyambate.

Pamoja na hayo Afisa Tarafa ya Chalinze Ndg Thomas Mollel  Amewasihi wajumbe,watendaji na wataalamu kusimamia rasilimali na kuwa waadilifu kwa dhamana walizopewa.

“Ninawasihi ndugu wajumbe na wataalamu wote tuwe waadilifu kwa dhamana tuliopewa na serikali kuwatumikia wananchi ili kuleta maendeleo ndani ya Chalinze na Taifa kwa ujumla”. Thomas Mollel.

Nao baadhi ya wajumbe wa kamati wametoa mapendekezo kwa Baraza la Mamlaka ya mji mdogo ili kuleta maendeleo na kufanya kazi kwa ufanisi  ambapo wametaja mapendekezo hayo ni pamoja na elimu kwa wajumbe wapya wa baraza la mamlaka ya mji mdogo, Ziara za ukaguzi wa miradi mbalimbali, maboresho ya dampo au sehemu ya kuhifadhia taka, Alama za kuvuko cha barabarani  pamoja na kuwaalika wataalam wengi zaidi katika vikao.

Ikumbukwe kuwa Mamlaka ya Mji mdogo Chalinze unaundwa na kata kuu mbili ambazo ni Kata ya Bwilingu pamoja na Kata ya Pera.