Baraza la Ushauri wilaya ya Bagamoyo (DCC) lapokea taarifa ya Utekelezaji 2021/2022

Imewekwa: November 28th, 2022

Baraza la Ushauri la wilaya ya Bagamoyo(DCC) limepokea taarifa ya utekelezaji wa miradi mbalimbali ya Maendeleo kutoka Halmashauri ya Wilaya ya Chalinze. Taarifa hiyo imewasilishwa na Afisa Mipango wa Halmashauri ya Chalinze Bwana Shabani Millao kwa niaba ya Mkurugenzi Mtendaji wa Halmashauri ya wilaya ya Chalinze.

Kikao hicho kimefanyika katika Ukumbi wa Jakaya Kikwete kwa kujumuisha Halmashauri zote mbili za Bagamoyo na Chalinze na Taasisi zinazofanya kazi katika Halmashauri hizo kwa maana ya TARURA,RUWASA,TRA,TANESCO na DAWASA. Taasisi zote hizo zimewasilisha taarifa za utekelezaji wa Majukumu mbalimbali kwa mujibu wa mipango kazi ya Taasisi hizo na kujadiliwa na wajumbe wa kikao hicho kwa kuzingatia ufanisi na changamoto zinazoyakabili mashirika hayo.

Katika kikao hicho kinachofanyika kila mwaka mara mbili kwa mujibu wa Sheria ya Tawala za Mikoa ya mwaka 1997 pamoja na marekebisho yake ni kikao kinachofanyika kwa misingi ya kupokea taarifa za utekelezaji na kutoa ushauri kwa utendaji na utekelezaji wa miradi mbalimbali ya Maendeleo katika Mamlaka za Serikali za Mitaa nchini.

Mkuu wa wilaya ya Bagamoyo Mheshimiwa Zainab Abdallah akiongoza Kikao hicho baada ya taarifa za utekelezaji kwa kila Halmashauri, Mkuu wa wilaya alizitaka Halmashauri kuwa na miradi ya kimkakati ambayo itaziwezesha Halmashauri kuzalisha fedha kutokana na uwekezaji unaotokana na mapato ya ndani ya Halmashauri.

Kwa upande wa Taasisi za umma zinazojitegemea alizitaka kutoa huduma kwa wananchi kwa weledi kwa kuhakikisha miundombinu ya barabara,Maji na Umeme inawafikia wananchi pasipo shaka na Kuhakikisha wanatatua kero kwa muda mara zinapojitokeza bila kuchelewa.

“Halmashauri ni wataalam na Madiwani niwatake mfanye kazi kama timu ili kuwaletea Maendeleo wananchi na kila mmoja asimame kwenye nafasi yake kwa kutekeleza majukumu yake,tubadilike ndugu zangu.” Mkuu wa wilaya alisema.”

Kwa upande wake Mwenyekiti wa Halmashauri ya wilaya ya Chalinze,Mheshimiwa Hassani Mwinyikondo aliwataka washiriki wa kikao hicho kwa maana ya wataalam wa Mamlaka za Serikali za Mitaa na Mashirika yanayojitegemea kuwa na moyo wa kizalendo katika kuwatumikia wanachalinze na watanzania kwa ujumla ili kutekeleza Ilani ya Chama cha Mapinduzi kama kilivyowaahidi watanzania.

Naye Mkurugenzi Mtendaji wa Halmashauri ya wilaya Bwana Ramadhani Possi akichangia katika baraza hilo aliahidi kuyafanyia kazi maoni mbalimbali yaliyotolewa na wajumbe kwa misingi ya kuboresha utoaji huduma kwa wananchi sanjari na kuibua miradi ya kimkakati ambayo itakuwa na tija kwa Halmashauri na kuwa endelevu.