Baraza la wafanyakazi Chalinze lapitisha mapendekezo ya bajeti 2026/27

Imewekwa: February 10th, 2026

Baraza la Wafanyakazi la Halmashauri ya Wilaya ya Chalinze limepitisha mapendekezo ya bajeti ya stahiki za watumishi kwa mwaka wa fedha 2026/27, ambapo jumla ya shilingi bilioni 4.25 zimetengwa kwa ajili ya kugharamia stahiki mbalimbali za watumishi wa Halmashauri hiyo.

Bajeti hiyo, iliyowasilishwa mbele ya Mwenyekiti na Wajumbe wa Kamati Tendaji ya Baraza la Wafanyakazi, inalenga kuboresha ustawi wa watumishi kwa kugharamia stahiki ikiwemo likizo, matibabu, uhamisho, mazishi, mafunzo, sare za kazi, posho za kujikimu, masaa ya ziada, pamoja na gharama za pango, umeme na simu kwa Wakuu wa Idara na Vitengo.

Kwa mujibu wa makisio hayo, Halmashauri imetenga shilingi milioni 369 kwa ajili ya likizo, shilingi milioni 266.5 kwa uhamisho, shilingi milioni 18 kwa matibabu na shilingi milioni 83.3 kwa ajili ya mazishi ya watumishi. Aidha, shilingi milioni 228.69 zimetengwa kwa mafunzo ya muda mfupi na mrefu, huku shilingi milioni 25 zikitengwa kwa ajili ya kutoa zawadi kwa wafanyakazi 50 watakaobainika kuwa hodari katika utendaji kazi.

Katika hatua nyingine, Baraza limepokea taarifa ya upandishwaji vyeo kwa jumla ya watumishi 1,293 wanaotarajiwa kupandishwa vyeo kutokana na utendaji mzuri na muda wa utumishi wao. Pia, shilingi milioni 186 zimetengwa kwa stahiki za Wakuu wa Idara na Vitengo, na shilingi milioni 46.85 kwa ajili ya sare za kazi kwa watumishi wa idara na vitengo mbalimbali.

Kuhusu ajira mpya, imeelezwa kuwa katika mwaka wa fedha 2026/27 Halmashauri imetenga nafasi 120 za ajira katika sekta za elimu, afya na ujenzi, huku Baraza likitoa pongezi kwa Serikali kwa kuipatia Halmashauri jumla ya watumishi wapya 123 katika kada mbalimbali, hususan afya, elimu sekondari, kilimo na mifugo pamoja na maliasili na mazingira.

Sehemu kubwa ya bajeti imetengwa kugharamia posho za kujikimu na masaa ya ziada, ambapo shilingi bilioni 1.25 zimetengwa kwa posho za kujikimu na shilingi bilioni 1.35 kwa ajili ya posho za masaa ya ziada kwa watumishi wa idara mbalimbali, fedha zitakazotokana na mapato ya ndani pamoja na ruzuku kutoka Serikali Kuu.

Baraza la Wafanyakazi pia limejadili mikakati ya utekelezaji wa bajeti hiyo ikiwemo kuhakikisha ukusanyaji wa mapato ya ndani kwa asilimia 100, kuendelea kupata ruzuku kutoka Serikali Kuu kwa ajili ya kulipa stahiki za watumishi, pamoja na kuimarisha usimamizi na uwajibikaji kwa watumishi wote.

Wajumbe wa Baraza walieleza kuwa utekelezaji mzuri wa bajeti na kipaumbele kilichowekwa katika ulipaji wa stahiki umechangia kwa kiasi kikubwa kupunguza malalamiko ya watumishi, kuongeza ari ya kazi na kuimarisha ufanisi wa utoaji wa huduma kwa wananchi wa Wilaya ya Chalinze.