Baraza la wafanyakazi lapitisha mapendekezo ya makisio ya Bajeti ya Halmashauri ya Chalinze

Imewekwa: January 28th, 2023

Baraza la wafanyakazi Halmashauri ya Wilaya ya Chalinze lapitia na kujadili Mapendekezo ya Bajeti ya Halmashauri ya wilaya ya Chalinze kwa mwaka wa fedha 2023/2024 katika Ukumbi wa mikutano wa Jakaya Kikwete ambapo kikao hicho kimeongozwa na Mwenyekiti wa baraza la wafanyakazi wa Halmashauri ambaye ni Kaimu Mkurugenzi Mtendaji wa Halmashauri ya wilaya ya Chalinze Ndg.Jovin Bararata.

Katika kikao hicho Bi.Agricola Surumbu kwaniba ya Afisa Mipango wa wilaya ,aliwasilisha Mapendekezo ya Bajeti ya Jumla ya fedha za kitanzania bilioni 51.9 kwa kuainisha bajeti ya maendeleo,mishahara,ruzuku,mapato ya ndani,michango ya Jamii na Ada za shule  kwa mwaka wa fedha 2023/2024.

Aidha Mwenyekiti wa Baraza hilo ndg. Jovin Bararata alitoa ufafanuzi juu ya Mapendekezo hayo ambapo amesema kuwa bajeti hiyo ni Mapendekezo tu mpaka pale Vikao vya juu vitakaporidhia.

"Mapendekezo hayo siyo bajeti iliyoidhinishwa, bali ni Mapendekezo ya Bajeti ambayo yanaweza yakawa yalivyo au sivyo kutokana na vikao vya juu baada ya kuwa vimeridhia mpango huo wa Bajeti katika Halmashauri yetu".Amesema Ndg.Bararata.

Kikao hicho ni kwa mujibu wa sheria ya Bajeti inayotaka Mapendekezo ya Bajeti kupitiwa na baraza la wafanyakazi kabla ya kujadiliwa na vikao vya baraza la madiwani, ili wafanyakazi na vyama vya wafanyakazi kujiridhisha kama stahiki za wafanyakazi zimezingatiwa kwa mujibu wa sheria na miongozo ya Bajeti.