Baraza la wafanyakazi limeridhia Mapendekezo ya Bajeti Chalinze

Imewekwa: February 11th, 2019

Mapendekezo ya Bajeti ya Halmashauri ya wilaya ya Chalinze kwa mwaka 2019/2020 yamepitiwa na kujadiliwa katika kikao cha Baraza la wafanyakazi wa Halmashauri ya Wilaya leo katika Ukumbi wa shule ya sekondari ya Lugoba, kikao hicho kimeongozwa na Mwenyekiti wa baraza la wafanyakazi wa Halmashauri ambaye ni Mkurugenzi Mtendaji wa Halmashauri ya wilaya ya Chalinze Bi Amina Kiwanuka.

Katika kikao hicho Afisa Mipango wa wilaya Bwana Shabani Millao ,aliwasilisha Mapendekezo ya Bajeti ya Jumla ya fedha za kitanzania bilioni 50.6 kwa kuainisha bajeti ya maendeleo,mishahara,ruzuku,mapato ya ndani,michango ya Jamii na Ada za shule  kwa mwaka wa fedha 2019/2020. Naye Afisa Utumishi na Utawala wa Halmashauri ya wilaya ya Chalinze ,Bi Jane Mfuko alitoa ufafanuzi kuhusu watumishi watakao panda vyeo na watumishi watakao badilishiwa kazi yaani "Recategorization" kwa mwaka wa fedha wa 2019/2020.Mfuko aliendelea kufafanua kuwa Mapendekezo haya siyo bajeti iliyoidhinishwa, bali ni Mapendekezo ya Bajeti ambayo yanaweza yakawa yalivyo au sivyo kutokana na vikao vya juu baada ya kuwa vimeridhia mpango huo. 

Kikao hiki ni kwa mujibu wa sheria ya Bajeti inayotaka Mapendekezo ya Bajeti kupitiwa na baraza la wafanyakazi kabla ya kujadiliwa na vikao vya baraza la madiwani, ili wafanyakazi na vyama vya wafanyakazi kujiridhisha kama stahiki za wafanyakazi zimezingatiwa kwa mujibu wa sheria na miongozo ya Bajeti. 

Kwa upande wake Katibu wa chama cha walimu wilaya ya Bagamoyo, Bi Sekela Mlaga alitoa maoni yake katika Mapendekezo ya Bajeti hiyo kwa kuwataka wakuu wa Idara hususan Elimu kuzingatia stahiki za watumishi, kama likizo,motisha kwa wafanyakazi hodari na stahiki nyinginezo zizingatiwe katika mpango huu wa bajeti Kwani stahiki hizi huwatia moyo watumishi katika utendaji kazi wao.

Naye Katibu wa TUGHE mkoa wa Pwani, Bwana Shadrack Mkodo alitoa rai yake katika Mapendekezo ya Bajeti kwa kuwasemea wafanyakazi ambao wamekuwa wakiwekwa katika mpango wa kupanda vyeo kwa miaka mitatu mfululizo iliyopita, lakini mpaka sasa hawajawahi kupanda na bado hata katika Mapendekezo ya Bajeti hii wamo pamoja na waliofikia kupanda kwa mwaka huu rasmi. Kutokana na kero hiyo kwa wafanyakazi ameiomba serikali kuwatendea haki watumishi hao ili wapate stahiki zao kwa wakati.

Hata hivyo baada ya wajumbe wa baraza la wafanyakazi kupitia Mapendekezo ya Bajeti kwa kila kipengele kwa pamoja walishauri na mwisho waliridhia mapendekezo hayo.