Benki ya Stanbic yatoa Vifaa tiba Miono

Imewekwa: June 6th, 2020

Benki ya Stanbic Bank Tanzania imetoa msaada wa vifaa tiba katika kituo cha Afya Miono , vifaa hivyo vilitolewa jana. Stanbic Bank imetoa Vifaa tiba hivyo ili kuunga mkono juhudi za serikali ya awamu ya tano katika kuboresha huduma za afya kwa wananchi .

Kabla ya makabidhiano ya vifaa tiba hivyo watumishi wa Stanbic Bank na Mbunge wa Jimbo la Chalinze Mheshimiwa Ridhiwani Kikwete walikagua miundombinu ya kituo cha Afya Miono na kuona ubora wa kituo hicho.

Baada ya Ukaguzi wa miundombinu hiyo mwakilishi wa Stanbic Bwana Richard Chenga alikabidhi vifaa tiba hivyo kwa Mbunge wa Jimbo la Chalinze Mheshimiwa Ridhiwani Kikwete vyenye thamani ya fedha za kitanzania Milioni 9.4,Vifaa tiba hivyo vitakuwa ni suluhisho la matatizo ya kiafya kwa wananchi wa Miono kwani huduma zitakazo tolewa kituoni hapo hakutakuwa na sababu ya wagonjwa kwenda hospitali ya wilaya.

Baada ya makabidhiano hayo Mheshimiwa Kikwete alitoa shukrani zake kwa Benki ya Stanbic kwa niaba ya wananchi wa Chalinze na kuiomba menejimenti ya Benki ya Stanbic kuendelea kuwa na uzalendo katika kuunga mkono juhudi za Mheshimiwa Rais wa Jamhuri ya Muungano wa Tanzania Dkt John Pombe Magufuli katika kuhakikisha mtanzania anapata huduma bora za afya popote alipo.

Aidha Mheshimiwa Kikwete alikabidhi vifaa tiba hivyo kwa Kaimu Mkurugenzi Mtendaji wa halmashauri ya chalinze Bi Zainabu Makwinya ili vifaa hivyo viweze kutumika katika Kituo hicho cha afya.

Kwa upande wake Kaimu Mkurugenzi wa halmashauri ya Chalinze Bi Zainabu Makwinya alishukuru Benki ya Stanbic kwa kutoa vifaa tiba vizuri na vya kisasa na kuwataka wataalam wa afya katika kituo cha Afya Miono kuvitunza vifaa tiba hivyo na kuvitumia kwa uangalifu ili viweze kutumika kwa muda mrefu na kwa malengo yaliyokusudiwa.

Naye Diwani wa kata ya Miono Mheshimiwa Juma Mpwimbwi alimshukuru Mheshimiwa Mbunge kwa juhudi anazozifanya katika kutafuta wahisani mbalimbali wanaoweza kuisaidia halmashauri ya chalinze na akawashukuru Benki ya Stanbic kwa moyo wao wa upendo hata kuweza kuwakumbuka wananchi wa Miono.