Bilioni 2.5 Zapitishwa na Baraza la Madiwani Chalinze kwa ajili ya Matengenezo ya Barabara

Imewekwa: December 12th, 2023

                       Na John Mlyambate 

Madiwani wa Halmashauri ya Chalinze wilaya ya Bagamoyo wamepitisha rasimu ya Mpango wa Bajeti kwa mwaka 2024/2025 sh. 2.5 Bilioni iliyowasilishwa na Meneja wa Wakala wa Barabara za Vijijini na Mijini.

Fedha hizo ni mahitaji halisi kwa ajili ya matengenezo ya barabara huku nyingi zikiwa na malimbikizo ya matengenezo ambayo husababisha hali zake kuwa duni  na hivyo kuhitaji kiasi kikubwa cha fedha.

Kwa mujibu wa Meneja wa TARURA Wilaya ya Bagamoyo Mhandisi Bupe Angetile, mpango huo lengo lake ni kuondoa mapungufu ndani ya mtandao wa barabara unaosimamiwa na Taasisi hiyo kwa kutumia taarifa za utambuzi na hali halisi ya barabara.

Akiwasilisha rasimu hiyo kwenye kikao cha Baraza Maalumu la Madiwani Mhandisi Bupe alisema,  vigezo mbalimbali vimetumika wakati wa utayarishaji wa mpango huo ikiwa ni pamoja na upatikanaji wa rasilimali fedha.

Vigezo vingine ni pamoja na mwenendo wa mahitaji ya uwekezaji, usalama wa warumiaji, aina ya barabara kwa misingi ya madaraja na tabaka la juu na wingi wa vyombo vya usafiri sambamba na kuboresha barabara za udongo kwenda Changarawe.

"Mapendekezo ya mpango huu wa bajeti 2024/2025 yanahusisha mpango kazi za mayengenezo inayogharamiwa na Mfuko wa barabara, pia miradi ya maendeleo ambayo hugharamiwa na mfuko huo na fedha za tozo za mafuta," alieleza Mhandisi Bupe.

Kadhalika alisema mpango wa bajeti wa mwaka wa fedha 2023/2024 TARURA wilaya ya Bagamoyo katika Halmashauri ya Chalinze ilitengewa sh. 2.2Bilioni kutoka vyanzo vyote vya fedha ikiwemo mfuko wa barabara, tozo na fedha za Jimbo.

Hata hivyo hadi kufikia Novemba 2023, hakuna matumizi ya fedha za matengenezo ya miradi ya barabara kwa kipindi cha mwezi Julai hadi Novemba kwakuwa hakuna mapokezi ya fedha za matengenezo.

Alieleza vikwazo katika Taasisi hiyo kuwa ni pamoja an ufinyu wa bajeti, uwepo wa miundombinu mbalimbali katika barabara zinazojengwa suala linalopelekea gharama za kuiondoa kuwa kubwa.

Makamu Mwenyekiti wa Halmashauri hiyo Ramadhani Mkufya alisema TARURA wanatakiwa kuzingatia kuweka mifereji kwenye barabara wanazojenga ili zisiharibiwe kipindi cha mvua.

Diwani wa Ubena Godfrey Kamugisha aliomba Tarura kuwasimamia wakandarasi wajenge barabara imara kulingana na fedha zilizotolewa huku akiweka msimamo wa kutokubali fedha za matengenezo kupelekwa barabara ya Lulenge ambayo imejengwa chini ya kiwango badala yake zitumike kufungua barabara mpya ya Tukamisasa- Mbuyu.