Chalinze kinara kwa pato ghafi kwa hal

Imewekwa: August 16th, 2019

Halmashauri ya wilaya ya Chalinze Mkoani Pwani imeibuka kidedea kwa kukusanya pato ghafi jumla ya fedha za kitanzania bilioni 7.6,na kuwa kinara kwa halmashauri za wilaya nchini Tanzania kwa mwaka wa fedha 2018/2019.
    Taarifa ya kuongoza kwa halmashauri hiyo imetolewa na waziri wa nchi Ofisi ya Rais Tawala za Mikoa na Serikali za Mitaa,Mhe Selemani Jafo leo Jijini Dodoma alipokuwa akizungumza na watanzania kupitia mkutano wa waandishi wa Habari ili kuwajuza watanzania juu ya ukusanyaji wa mapato katika mamlaka za serikali za mitaa nchini.
    Waziri Jafo katika taarifa yake kwa vyombo vya Habari aliitaja halmashauri ya wilaya ya Chalinze kuwa halmashauri iliyoongoza kwa kukusanya pato ghafi la jumla ya fedha za Kitanzania bilioni 7.6 na kuwa kinara kwa halmashauri za wilaya nchini kwa kuvuka lengo la makisio ya bajeti kwa asilimia 32 hivyo kukusanya kwa asilimia 132.
    Mheshimiwa Jafo ameipongeza halmashauri ya wilaya ya Chalinze kwa kuibuka kidedea kwa maana ya kukusanya kwa ziada na kuwataka watendaji wa halmashauri nchini kuibua mikakati bora zaidi kwa mwaka wa fedha 2019/2020 ili kufikia malengo ya ukusanyaji mapato kulingana na mpango na bajeti kwa kila halmashauri.
     Kwa upande wake Mwenyekiti wa halmashauri ya wilaya ya Chalinze Mheshimiwa Saidi Zikatimu baada ya kusikia taarifa ya Waziri Jafo kuhusu Chalinze kuwa kinara kwa halmashauri za wilaya nchini aliwapongeza watendaji wa halmashauri na madiwani kwa kufanya kazi kwa ushirikiano. ‘Tulifanya kazi kama timu na malengo ilikuwa ni kutekeleza miradi ya maendeleo tumetekeleza na tunasonga mbele “.Zikatimu alisema.
         Naye Mkurugenzi wa halmashauri ya wilaya ya Chalinze Bi Amina Kiwanuka amewashukuru madiwani,wataalamu wa halmashauri kwa ushirikiano wa hali ya juu katika suala la ukusanyaji mapato.”Kwa juhudi za pamoja ndizo zilizozaa matunda hata tukafikia hatua ya kuongoza kwa kuwa na pato ghafi la fedha za kitanzania bilioni 7.6 na kuwa kinara kwa halmashauri za wilaya nchini “.Kiwanuka alieleza.
     Hata hivyo Mkurugenzi Kiwanuka aliendelea kumshukuru Mkuu wa wilaya ya Bagamoyo Mhe Zainabu Kawawa na kamati yake ya ulinzi na usalama kwa kutoa ushirikiano mkubwa katika suala zima la ukusanyaji mapato na kuendelea kuomba ushirikiano wa hali ya juu kwa mwaka wa fedha 2019/2020 kwa ufanisi zaidi na zaidi.