Chalinze yang'ara kimkoa katika utoaji wa huduma za afya

Imewekwa: November 6th, 2018

Zahanati ya kijiji cha Msata katika halmashauri ya wilaya ya Chalinze imeibuka kidedea kimkoa baada ya kufanya vizuri katika utoaji huduma za afya kwa wananchi kwa kuzingatia matokeo makubwa sasa(BRN) na kufanikiwa kupata nyota nne kati ya vituo vyote vya afya katika mkoa wa Pwani.

Ushindi huo umepatikana kutokana na ukaguzi uliofanywa na wizara ya Afya kwa ajili ya malipo kutokana na matokeo ya huduma kwa matokeo makubwa sasa,Zahanati ya Msata ilionekana kukidhi vigezo vilivyowekwa na wizara ya Afya kwa kutoa huduma bora kwa wananchi kwa kuzingatia matokeo makubwa sasa.

Kwa upande wake Mkurugenzi wa halmashauri ya wilaya ya Chalinze Bi.Amina Kiwanuka,aliwapongeza watumishi wa zahanati ya Msata kwa kufanya kazi kwa kuzingatia vigezo vinavyotolewa na wizara ya Afya na kufanikiwa cheti chenye nyota tano na kuvitaka vituo vingine vya afya na zahanati wilayani humo kuiga mazuri kutoka zahanati ya Msata ili kwa ukaguzi ujao vituo vyote vya afya katika halmashauri ya Chalinze viweze kuibuka kidedea na kupata nyota tano ili kufikia matokeo makubwa sasa katika sekta ya Afya "Mganga Mkuu wa wilaya nakutaka sasa usimamie utoaji huduma za afya kwa wananchi na uhakikishe vigezo vyote vinavyotakiwa kwa mujibu wa matokeo makubwa sasa vinazingatiwa na kufanyiwa kazi." Kiwanuka alisema.

Naye Mganga Mkuu wa halmashauri ya Chalinze Dkt Rahim Hangai alipokea maelekezo ya Mkurugenzi Mtendaji wa Halmashauri ya Chalinze na kuahidi kusimamia kwa ukaribu utoaji huduma na akaongezea na kusisitiza kwa watumishi wote wa afya kuzingatia miongozo ya wizara ili ukaguzi ujao vituo vyote vya afya vinafikia vigezo na kutunukiwa cheti cha ufanisi.