Chalinze yapata Hati Safi mfululizo kwa miaka miwili

Imewekwa: July 3rd, 2019

Wataalamu wa halmashauri ya Wilaya ya Chalinze wapongezwa katika kikao maalumu cha baraza la hoja za ukaguzi kwa mwaka wa Fedha 2018 /2019 kwa kazi nzuri wanazozifanya katika usimamizi na ukusanyaji mapato ya ndani na matumizi sahihi ya fedha kwa mujibu wa sheria, taratibu na kanuni za fedha.

    Pongezi hizo zimetolewa jana na wajumbe wa baraza la Madiwani, wataalamu kutoka kwa Mdhibiti na Mkaguzi Mkuu wa Hesabu za serikali na wataalam kutoka sekretarieti ya Mkoa wa Pwani kwa kufanya kazi kwa mujibu wa sheria za nchi na kupata Hati safi mfululizo kwa miaka miwili mwaka wa Fedha 2016/2017 na 2017/2018,hii ni kwa mujibu wa ripoti ya Mdhibiti na Mkaguzi Mkuu wa Hesabu za Serikali(CAG) mweziAprili 2019.Taarifa hiyo ilionyesha hati ya ukaguzi,hoja zilizoibuliwa na Mkaguzi na Mdhibiti Mkuu wa Hesabu za Serikali kwa mwaka wa Fedha 2017/2018 pamoja na mapendekezo ya Mkaguzi kwa kila hoja iliyoibuliwa.

    Katika kikao hicho maalum Makamu Mwenyekiti Wa halmashauri ya Wilaya ya Chalinze Mhe Juma Mpwimbwi kwa niaba ya baraza la Madiwani aliwapongeza wataalam wa halmashauri kwakuzingatia sheria taratibu na kanuni katika matumizi ya fedha za halmashauri,na kwa kuwa wasikivu na waadilifu katika kupokea Ushauri na miongozo kutoka Mamlaka za juu kama sekretarieti ya Mkoa, Ofisi ya Mdhibiti na Mkaguzi Mkuu wa Hesabu za Serikali."Matokeo ya uadilifu huo ni upatikanaji wa Hati safi mfululizo kwa miaka miwili."Mpwimbwi alisema.

     Kwa upande wake Afisa serikali za Mitaa kutoka ofisi ya Mkuu wa Mkoa wa Pwani,Bwana Rashid Baghdellah aliupongeza uongozi wa halmashauri ya Chalinze kwa kuzingatia sheria, taratibu na kanuni za matumizi ya fedha kitu ambacho kimeiwezesha halmashauri kupata Hati safi mfululizo kwa miaka miwili. Baghdellah aliendelea kutoa Ushauri katika kuboresha ukusanyaji mapato kwa kutumia mbinu mbalimbali za kiteknolojia ili kudhibiti upotevu wa mapato, "Tumieni kamera maalumu (CCTV camera)katika vituo vya Malipo ya ushuru, kamera hizi zitatusaidia kupata uhalisia wa mapato tunavyokusanya ukilinganisha na Idadi ya malori yanayo pita kwa siku, kwa kufanya hivyo tutaongeza mapato ya halmashauri na kuimarisha ulinzi." Baghdellah alishauri.

    Diwani wa kata ya Kimange Mhe Hussein Hading'oka kwa furaha ya pekee aliwapongeza wataalam wa halmashauri kwa kuwa na ushirikiano mzuri katika kazi na Madiwani, wadau mbalimbali na wananchi kwa kitu kinacholeta ufanisi katika halmashauri ya Chalinze."Tumefanikiwa mengi kwa sababu ya umoja tulionao kati ya watendaji,madiwani na wananchi Chalinze tutazidi kushinda."Hading'oka alisema.

    Naye Mkurugenzi Mtendaji wa halmashauri ya Chalinze Bi Amina Kiwanuka alipokea pongezi hizo kwa niaba ya wataalam wa halmashauri na kupokea Ushauri wa wadau katika kuboresha shughuli za ukusanyaji mapato na utumiaji wa fedha za serikali kwa kuzingatia sheria za fedha za serikali za mitaa na bajeti kwa ujumla ili kuepukana na hoja za ukaguzi kwa kaguzi zijazo.