Chalinze yatoa mafunzo ya wagawa Dawa za Kinga tiba dhidi ya mabusha na matende

Imewekwa: May 16th, 2025

Halmashauri ya Chalinze kupitia Idara ya Afya imeendesha mafunzo kwa Wagawaji Dawa za Kinga Tiba (Community Drug Distributors) kwa ajili ya kupambana na magonjwa ya mabusha na matende katika kata ya Bwilingu. Mafunzo hayo yamelenga kuwajengea uwezo wahudumu hao wa afya ngazi ya jamii ili kuhakikisha wananchi wanapata huduma bora na salama katika zoezi la ugawaji wa dawa hizo.

Mafunzo hayo yametolewa leo katika ukumbi wa mikutano wa Jakaya Kikwete kwa wahudumu wa afya kutoka kata ya Bwilingu na vitongoji vyake, ikiwa ni maandalizi ya zoezi la kitaifa la ugawaji wa dawa dhidi ya magonjwa yasiyopewa kipaumbele. Mafunzo hayo yamehusisha mbinu za utoaji dawa, usalama wa mgonjwa, na namna ya kutoa elimu kwa jamii kuhusu madhara ya mabusha na matende.

Akizungumza wakati wa mafunzo hayo, Mratibu wa Magonjwa Yaliyokuwa Hayapewi Kipaumbele katika Halmashauri ya Chalinze, Dkt. Waziri Mkuwili alisema kuwa zoezi la ugawaji wa dawa litaanza rasmi mwishoni mwa mwezi Mei katika kata ya Bwilingu na vitongoji vyake. Alisema lengo ni kuokoa afya za wananchi na kuhakikisha ugonjwa huo unatokomezwa katika jamii.

Dkt. Mkuwili alibainisha kuwa zoezi hilo litakuwa endelevu, likihusisha ufuatiliaji na tathmini ya mara kwa mara ili kubaini hali halisi ya maambukizi. Aliongeza kuwa magonjwa yasiyopewa kipaumbele kama mabusha na matende huathiri zaidi jamii maskini, hivyo juhudi hizi ni muhimu katika kuleta usawa wa kiafya na kupunguza umaskini.

Mpango huo unatekelezwa chini ya kauli mbiu isemayo, “Hakuna umasikini, hakuna magonjwa yaliyokuwa hayapewi kipaumbele; hakuna magonjwa yaliyokuwa hayapewi kipaumbele, hakuna umasikini”, ikiwa ni sehemu ya malengo ya kutokomeza kabisa mabusha na matende nchini Tanzania ifikapo mwaka 2030. Halmashauri ya Chalinze imejipanga kuhakikisha wananchi wote wanapata tiba na kinga dhidi ya magonjwa haya hatarishi.