Chalinze yaunda timu ya UMITASHUMTA

Imewekwa: June 4th, 2018

Halmashauri ya wilaya ya Chalinze yakamilisha zoezi la uundaji wa timu ya wilaya ya Umoja wa Michezo na Taaluma wa Shule za Msingi Tanzania(UMITASHUMTA),kwa Mujibu wa Afisa Elimu Msingi Bi Zainabu Makwinya,”Mashindano haya yalinzia ngazi ya shule,Kata na leo tutahitimisha kwa kuunda timu ya wilaya itakayo peperusha bendera ya Halmashauri kwenda Mkoani kushindana na hatimaye kupata timu ya Mkoa”Makwinya alisema.

Makwinya aliyasema hayo katika taarifa yake ya uendeshaji wa michezo Jana katika viwanja vya shule ya sekondari ya Lugoba kwa Mgeni Rasmi katika mashindano hayo ambaye ni Mkuu wa wilaya ya Bagamoyo,Mheshimiwa Majid Mwanga ambaye aliambatana na viongozi mbalimbali akiwemo Mkurugenzi Mtendaji wa Halmashauri ya Wilaya ya Chalinze,Bwana Edes Lukoa,Mwenyekiti wa Halmashauri,Mheshimiwa Said Zikatimu na Mwenyekiti wa Kamati ya Elimu, Afya na Maji,Mheshimiwa Malota Hussein ambaye ni Diwani wa kata ya Kiwangwa.

Afisa Elimu aliweza kubainisha changangamoto mbalimbali zinazoikabili Idara katika suala zima la uendeshaji michezo,ikiwa ni pamoja na ufinyu wa bajeti ya michezo unaaopelekea muda wa maandalizi kwa walimu na wanafunzi kuwa mfupi na kusababisha wanafunzi kutofanya vizuri katika mashindano wanapokuwa wanashindana na halmashauri zingine na ukosefu wa vifaa vya michezo.”Japo kwa mwaka huu hii siyo changamoto tena kwani mpaka sasa kwa bajeti ya mwaka huu wa fedha tumeweza kununua vifaa vya michezo vyenye thamani ya fedha za kitanzania Milioni 5.7 hivyo vifaa siyo tatizo tena kwa Chalinze na tutaendelea kuboresha kila mwaka.”Makwinya alisema.

Hata hivyo Mkurugenzi Mtendaji wa Halmashauri aliishukuru na kuipongeza Idara ya Elimu Msingi kwa moyo wa uzalendo wa kuweza kununua vifaa vya michezo pamoja na ufinyu wa bajeti na kuzitaka Idara zingine ziige na kujifunza kutoka Idara ya Elimu Msingi na kuwapongeza walimu kwa kujitoa kwao katika kuwaandaa na kuwasimamia wanafunzi kuanzia ngazi ya shule hadi ya wilaya na kusisitiza uadilifu kwa walimu na wanafunzi wanapokuwa katika kambi za michezo kwani uadilifu ni msingi wa mafanikio.

Naye mwenyekiti wa kamati ya Elimu,Afya na Maji,Malota Husein alisema “Kwa uzalendo mliuonyesha mimi pamoja na madiwani tutapambana katika kuboresha suala la michezo kwa kutenga bajeti inayotosheleza ili tuweze kuboresha michezo mashuleni,katika hili Mkurugenzi ,Mwenyekiti na madiwani kwa ujumla hatuna tatizo.”Malota alisema.

Kwa upande wake Mgeni Rasmi katika shughuli hii muhimu alitoa nasaha zake kwa wanafunzi na walimu kwa kuwasisitiza kuzingatia maadili na sheria za michezo ili wapeperushe bendera ya Chalinze na kurudi na ushindi waendako na baada ya mashindano haya waje wasome kwa bidii kwa maslahi ya Taifa.Baada ya nasaha hizo alitamka rasmi kufungua mashindano hayo.