DAWASA Chalinze yafanya kikao kazi na Baraza la Madiwani

Imewekwa: December 12th, 2024

Na John Mlyambate

Mkoa wa Kihuduma DAWASA Chalinze umefanya kikao kazi na Baraza la Madiwani wa Halmashauri ya Wilaya ya Chalinze kwa lengo la kuboresha huduma za usambazaji wa maji kwa wananchi. Kikao hicho kimefanyika leo katika Ukumbi wa Mikutano wa Jakaya Kikwete.

Katika kikao hicho, Meneja wa DAWASA Chalinze, Bw. Abraham Mwanyamaki, akiwasilisha taarifa ya taasisi yake, alielezea hali ya upatikanaji wa maji, utekelezaji wa miradi ya maji, na changamoto zinazokwamisha utoaji wa huduma stahiki kwa wananchi. Bw. Mwanyamaki alisisitiza kuwa DAWASA inajitahidi kukabiliana na changamoto hizo ili kuboresha huduma.

Baada ya wasilisho hilo, madiwani walitoa michango mbalimbali. Mheshimiwa Juma Mpwimbwi, Diwani wa Kata ya Miono, alihimiza DAWASA kupunguza gharama za maji, akisema kuwa bei ya maji kwa Chalinze ni ya juu ukilinganisha na maeneo mengine yanayohudumiwa na DAWASA.

Mheshimiwa Malota Kwagga, Diwani wa Kata ya Kiwangwa, aliipongeza DAWASA kwa juhudi zake licha ya changamoto wanazokutana nazo. Aliahidi kushirikiana na taasisi hiyo katika kulinda miundombinu ya maji ili kuepuka uharibifu unaosababishwa na watu wasio waaminifu.

Kwa upande wake, Mheshimiwa Jackson Mkango, Diwani wa Kata ya Pera, alitoa pongezi kwa DAWASA kwa ushirikiano mzuri na kata yake, huku akihimiza kuimarisha huduma katika maeneo yenye changamoto. Naye Mheshimiwa Ngeregezya, Diwani wa Kata ya Mkange, alieleza kuwa huduma ya maji katika kata yake inapatikana isipokuwa katika maeneo machache yanayokumbwa na uharibifu wa mabomba.

Mheshimiwa Debora Rashidi, Diwani wa Viti Maalum Tarafa ya Msoga, alitoa wito kwa madiwani wote kushirikiana katika kulinda miundombinu ya maji kwa maslahi ya wananchi wa Chalinze.

Mbunge wa Jimbo la Chalinze na Waziri wa Nchi, Ofisi ya Waziri Mkuu (Ajira, Kazi, Vijana, na Wenye Ulemavu), Mheshimiwa Ridhiwani Kikwete, alishauri DAWASA kufanya ukaguzi wa kina wa miundombinu ya maji na kuboresha maeneo yaliyochakaa ili kuhakikisha huduma bora kwa wananchi.

Mwenyekiti wa Halmashauri ya Wilaya ya Chalinze, Mheshimiwa Hassani Mwinyikondo, alihitimisha kikao kwa kuipongeza DAWASA na wachangiaji wote kwa kujadili changamoto na kutoa mapendekezo muhimu. Aliitaka DAWASA kuzifanyia kazi changamoto zilizobainishwa kwa maslahi ya wananchi wa Chalinze na taifa kwa ujumla.

Kikao kazi hicho kimejidhihirisha kuwa hatua muhimu katika kuboresha upatikanaji wa huduma za maji katika Wilaya ya Chalinze.