DC Bagamoyo Atatua Migogoro 28 Chalinze

Imewekwa: September 20th, 2018

Mkuu wa wilaya ya Bagamoyo Bi,Zainabu Kawawa,amesikiliza na kutatua migogoro 28 katika halmashauri ya wilaya ya Chalinze kwa kipindi cha wiki mbili zilizopita.Mkuu wa wilaya ameanza kufanya kazi hii kama moja ya majukumu yake tangu alipoteuliwa hivi karibuni na Mheshimiwa Rais wa Jamhuri ya Muungano wa Tanzania.

Mheshimiwa Kawawa amekuwa akisikiliza na kutatua migogoro mbalimbali kama ya ardhi,mipaka ya mashamba,mifugo kulisha mashamba ya wakulima na migogoro mbalimbali ya kijamii katika halmashauri zake za Bagamoyo na Chalinze.

Aidha Mheshimiwa Kawawa amekuwa akiwatumia wataalam mbalimbali katika halmashauri zake kutatua migogoro Kama wataalam wa ardhi,wanasheria na wataalam wa maendeleo ya jamii,hii ni katika kuhakikisha kuwa sheria taratibu na kanuni zinafuatwa katika utatuzi huo na pale inaposhindikana suluhu huwashauri kufika katika vyombo vya sheria kwa hatua zaidi.

Kwa mujibu wa Katibu Tawala wa Wilaya ya Bagamoyo,Hamza Amri alitoa ufafanuzi kwa kusema Ofisi ya Mkuu wa wilaya imejipanga kusikiliza kero za wananchi kwa kusikiliza na kutatua kero kwa siku mbili kwa wiki kwa maana ya kila Jumanne ya wiki tunasikiliza na kutatua kero kwa halmashauri ya Bagamoyo na kila Siku ya Alhamisi ni siku ya kusikiliza na kutatua kero na migogoro kwa wananchi wa Chalinze, utaratibu huu unafahamika kwa wakurugenzi wa halmashauri zote mbili na wananchi wamekwisha fahamu juu ya kazi hii. Katibu Tawala alifafanua."Tumedhamiria kutatua kero za wananchi ili kutekeleza maelekezo ya serikali ya awamu ya Tano chini ya Mheshimiwa Dkt. John Pombe Magufuli."Amri alisema.

Naye Mzee Omari Salum mkazi wa kijiji cha Pongwemsungura kata ya Msata,aliyefika katika kituo cha kutolea malalamiko alitoa ushuhuda wake mbele ya mwandishi wa gazeti hilo kwa kumshukuru Mkuu wa wilaya kwa hatua zake za makusudi kuwasaidia wanachalinze na wanabagamoyo kwa ujumla."Mungu ambariki binti huyu kwa moyo wa kujitoa kututatulia migogoro yetu na kutupatanisha pale tulipotofautiana na huu ndiyo Uongozi tulioutaka."Mzee Omari alisema.

Kwa upande wake Bi.Harafa Mtaula mmoja wa mashuhuda waliotatuliwa kero zao alieleza kuwa."Mkuu wa wilaya huyu ni mshauri na Mwelekezaji katika kutatua kero na migogoro yetu,anatumia wataalamu wake katika kutatua migogoro na kuwaelekeza wataalam kuwashauri wananchi kwa mujibu wa kazi zao".Bi Harafa alisema.

Hata hivyo Mkuu wa wilaya ya Bagamoyo alitoa maelekezo kwa maafisa Tarafa wote katika wilaya yake kutembelea wananchi katika vijiji vyao na kutanzua migogoro iliyo ndani ya uwezo wao ili kupunguza msongamano wa siku za kutatua migogoro kwa ngazi ya wilaya.