DC Bagamoyo Kutaja Vipaumbele vyake Mbele ya Wakuu wa Idara na Vitengo

Imewekwa: August 29th, 2018

Mkuu wa wilaya ya Bagamoyo,Mheshimiwa Zainabu Kawawa amekutana na wakuu wa Idara na Vitengo wa Halmashauri za Bagamoyo na Chalinze, katika kikao Kazi kilichofanyika katika ukumbi wa Halmashauri ya Bagamoyo jana.

Katika kikao Kazi hicho Mhe.Kawawa ametoa maelekezo kwa wakuu wa Idara na vitengo ya namna ya kuwatumikia wananchi wa Halmashauri za Bagamoyo na Chalinze kwa kuzingatia sheria taratibu na kanuni ili kufikia malengo yaliyowekwa na serikali katika kuwatumikia wa Tanzania.

Aidha katika kikao Kazi hicho Mkuu wa wilaya ametoa vipaumbele vyake kuwa ni kutatua migogoro ya Ardhi kwa wakulima na wafugaji ma wananchi kwa ujumla ili kuwe na amani na utulivu kwa wananchi,akawaagiza maafisa Tarafa kufanya Kazi ya kufuatilia kero zinazowakabili wananchi vijijini na kuzutafutia ufumbuzi wa haraka kwa maana ya uongozi shirikishi ili kurahisisha utoaji huduma kwa Jamii.Zainabu aliendelea kutoa ufafanuzi kwa kutoa maagizo kwa maafisa Elimu wa Msingi na Sekondari kufanya Kazi kwa bidii ili kuinua kiwango cha ufaulu kwa wanafunzi na kuzifanya Halmashauri za Bagamoyo na Chalinze kuwa katika nafasi nzuri kimkoa na kitaifa.

Kwa upande wa sekta ya afya aliwataka watumishi kufanya Kazi kwa weledi na moyo mkunjufu katika kuwahudumia wagonjwa na kutumia kauli za kiungwana zisizokuwa na maudhi kwa wagonjwa ,kwani unapokuwa mtumishi wa umma umekubali kulitumikia taifa hivyo hutakiwi kufanya vitendo vinavyoweza kusababisha wananchi kuichukia serikali.

Kipaumbele kingine alichokisema ni kuhakikisha kiwango cha ukusanyaji Mapato ya Halmashauri kinapanda kwa maana ya kukusanya kwa kuzingatia sheria taratibu na kanuni za Fedha sanjari na kuziba mianya yote inayoweza kusababisha upotevu wa Mapato ya Halmashauri. " Kwa yeyote atakayesababisha upotevu wa Mapato nitachukua hatua za haraka na kumwondosha katika Kazi hiyo" Mkuu wa wilaya alisema.

Mheshimiwa Zainabu Kawawa aliendelea kufafanua umuhimu wa kuzitangaza Halmashauri za Bagamoyo na Chalinze kwa kuvisema vivutio vya utalii vinavyopatikana katika Halmashauri zake ili viwe vivutio hapa nchini na hatimaye kuongeza vyanzo vya Mapato. Mwisho aliwaagiza wakurugenzi kubaini idadi ya wananchi walioajiriwa katika viwanda vilivyopo katika Halmashauri zake ili kuona jinsi Sera ya viwanda inavyozalisha ajira kwa wananchi sanjari na upatikanaji wa nishati ya umeme vijijini."Nahitaji kupata orodha ya vijiji vyote vyenye umeme na visivyo na umeme na kupata orodha ya vijijini vilivyo katika awamu ya tatu ya mpango wa umeme vijijini ili nivifanyie Kazi na kufahamu hatua mbalimbali za uunganishaji umeme." Kawawa alisema.

Kwa upande wake Mkurugenzi mtendaji wa Halmashauri ya Bagamoyo Bi Fatuma Omari Latu kwa niaba ya wafanyakazi wa Halmashauri ya Bagamoyo alikiri kupokea maelekezo yaliyotolewa na Mkuu wa wilaya na kuahidi kuyafanyia Kazi kwa mujibu wa sheria taratibu na kanuni za Utumishi wa umma."Kila mtu anafahamu taratibu na miiko ya Kazi kwa mujibu wa Taaluma yake,hivyo tekelezeni wajibu wenu."Mkurugenzi alisema.

Naye Mkurugenzi Mtendaji wa Halmashauri ya wilaya ya Chalinze Bi. Amina Mohamedi Kiwanuka alikiri kupokea maelekezo na kuahidi kuyafanyia Kazi kwa kadiri ya maagizo ya Mkuu wa wilaya na kuomba ushirikiano wa hali ya juu kutoka Halmashauri Mama yaani Bagamoyo na kuwataka watumishi kuwa waadilifu katika utekelezaji wa majukumu yao ili kuwatumikia wananchi Kama jinsi tulivyokabidhiwa dhamana hii.