DC Kawawa akaribishwa na Wazee Chalinze

Imewekwa: August 7th, 2018

Mkuu wa Wilaya ya Bagamoyo Bi Zainabu Rashidi Kawawa amefanya kikao na wazee wa Halmashauri ya Chalinze katika ukumbi wa shule ya sekondari ya Lugoba ni kikao cha kwanza cha utambulisho tangu ateuliwe kuwa Mkuu wa wilaya ya Bagamoyo.

Katika kikao hicho Mkuu wa wilaya aliwataka wananchi kuzingatia sheria taratibu na kanuni ili kuilinda amani ya Chalinze na Bagamoyo kwa ujumla ili kuondokana na migogoro ya ardhi ambayo inatokana na wakulima na wafugaji katika wilaya hii ya Bagamoyo.

Aidha Mheshimiwa Kawawa aliwataka kamati ya amani inayoongozwa na viongozi wa dini ikafanye kazi ya kuhubiri amani na utulivu makanisani na misikitini kwa malengo ya kujenga amani endelevu katika wilaya yetu.

Naye Mwenyekiti wa Kamati ya Amani katika halmashauri ya Chalinze Alhaji Hamis Nasoro alimkaribisha Mkuu wa wilaya kwa niaba ya wazee wa Chalinze na kuahidi kumpa ushirikiano wa hali ya juu katika shughuli zake za kuongoza Halmashauri ya Chalinze na Bagamoyo kwa ujumla.Hata hivyo Shekh Nasoro alimwambia Mkuu wa wilaya kuwa “Chalinze ni Halmashauri inayokabiliwa na changamoto ya migogoro ya ardhi ya wafugaji na wakulima hivyo Mungu akupe hekima katika kutanzua migogoro hiyo.”Nasoro alisema.

Kwa upande wake Mwenyekiti wa Halmashauri ya wilaya ya Chalinze,Saidi Zikatimu alimkaribisha Mkuu wa wilaya ya Bagamoyo kwa niaba ya wananchi wa halmashauri ya Chalinze na kumshukuru kwa kuanza kazi yake na mazungumzo na wazee na kuahidi kutoa ushirikiano wa hali na mali katika kuwatumikia wanachalinze na Bagamoyo kwa ujumla.

Mheshimiwa Zikatimu alimpa hali halisi ya migogoro ya ardhi katika halmashauri ya Chalinze kwa kumhakikishia ushirikiano katika utatuzi wa migogoro hiyo ambayo kwa kiasi fulani imefanyiwa kazi na kupatiwa ufumbuzi japo haijaisha,Zikatimu aliendelea kutoa angalizo kuwa “Kutokana na ujio wa Mkuu wa wilaya mpya watendaji na wananchi kwa ujumla tunatakiwa kuwa makini kwani kuna migogoro mingine inaweza kuanza upya wakati ilishatatuliwa na kupatiwa ufumbuzi.”Zikatimu alisema.