DC Okash awataka watendaji wa Halmashauri Kusimamia mkataba wa lishe

Imewekwa: July 20th, 2023

Mkuu wa wilaya ya Bagamoyo Mheshimiwa Halima Okash amewataka wataalamu wa halmashauri ya wilaya ya Chalinze kusimamia utekelezaji wa Mkataba wa lishe katika maeneo yao ya utendaji ili kufikia malengo ya mkataba,kwani hili in agizo la serikali ambalo kila Kiongozi katika eneo lake la utawala anatakiwa kulisimamia. Mheshimiwa Okash ametoa maelekezo hayo katika kikao cha tathmini ya utekelezaji wa mkataba wa lishe ngazi ya halmashauri kilichofanyika leo katika ukumbi wa mikutano wa Jakaya Kikwete.

Katika kikao hicho Mheshimiwa Okash amewata watendaji ambao hawakufanya vizuri katika utekelezaji wa mkataba wa lishe kujieleza kwanini wasichukuliwe hatua za kinidhamu kwa kushindwa kutekeleza maelekezo ya serikali. Aidha katika hotuba yake Mkuu wa wilaya ameagiza ratiba zote za kufanyika kwa siku za lishe na afya ya kijiji (VHND) ziwasilishwe ofisini mapema zaidi kwa utekelezaji na ameahidi kufuatilia na kushiriki kikamilifu katika mazoezi hayo.

Kuhusu suala la ulaji wa vyakula mashuleni watendaji kata wameagizwa kuongeza kasi ya uhamasishaji kwa wazazi au walezi kuhakikisha wanachangia vyakula ili watoto wote wapate chakula shuleni ili kuboresha afya za watoto mashuleni ikiwa ni moja ya kigezo cha utekelezaji wa mkataba wa lishe.

Hata hivyo pamoja na maelekezo yake amemtaka mkurugenzi mtendaji kumpatia wataalam wa idara ya afya ambao watatoa elimu ya afya kwa jamii ikiwemo elimu ya lishe akiwa katika ziara zake za kata kwa kata katika halmashauri ya Chalinze.

Kwa upande wake Mkurugenzi Mtendaji wa halmashauri ya Chalinze Bwana Ramadhani Possi alipokea maelekezo yote kutoka kwa Mkuu wa wilaya kwa utekelezaji na kuwaagiza watendaji wa kata kusimamia mkataba wa lisha kwa nguvu zote hii ni agenda ya kitaifa.