Dstv na UN Global Compact wagawa Miche 2000 ya Miti Chalinze

Imewekwa: January 23rd, 2023

Dstv kwa kushirikiana na Asasi isiyo ya kiserikali ya UN Global Compact Network Tanzania wametoa miche kwa ajili matunda na biashara ipatayo 2000 katika Halmashauri ya wilaya ya Chalinze makabidhiano hayo yamefanyika jana katika viwanja vya shule ya msingi Bwilingu A .Wakikabidhi Miche hiyo kwa Mbunge wa Jimbo la Chalinze Mheshimiwa Ridhiwani Kikwete ili aweze kuzikabidhi shule za Msingi na Sekondari zipatazo 10, Mkurugenzi wa UN Global Compact Bi.Marsha Macatta-Yambi alieleza dhima kuu ya Taasisi yake ni kuunga mkono jitihada za serikali ya awamu ya sita katika suala zima la utunzaji wa mazingira nchini Tanzania.

Bi. Macatta-Yambi ameahidi kuendelea kushirikiana na Halmashauri ya Chalinze katika suala zima la utunzaji Mazingira sanjari na kutoa miche zaidi katika Taasisi za serikali kama shule na taasisi zingine ambazo zitakuwa tayari kupanda na kuitunza miti hiyo.

Shule zilizopatiwa miche hiyo ni Shule za Msingi 6 ambazo ni Bwilingu A,Bwilingu B, Kibiki,Msoga,Chalinze na Chalinze Islamic. Kwa upande wa shule za sekondari ni Chahua,Beracha Valley,Moreto na Msata.

Mgeni rasmi katika hafla ya kukabidhi miche hiyo Mheshimiwa Ridhiwani Kikwete(Mb) na Naibu Waziri wa Ardhi,Nyumba na Maendeleo ya Makazi alizipongeza Taasisi za Dstv na UN Global Compact kwa uamuzi wao wa kugawa miche 2000 katika Halmashauri ya Chalinze na kuwaomba waendelee kusaidia na kuunga Mkono jitihada za serikali katika kuyatunza mazingira na kutoa Elimu zaidi ya utunzaji Mazingira kwa wananchi, kwani kupitia utunzaji wa mazingira kutakuwa na mvua za uhakika katika maeneo yetu hivyo kuwa na uhakika wa chakula kwa wananchi wetu.

Mheshimiwa Ridhiwani Kikwete alitoa rai kwa taasisi zingine pia kuunga mkono jitihada za serika katika suala la utunzaji mazingira ,alizitaka taasisi za fedha kama mabenki yanayofanya kazi katika halmashauri ya Chalinze kuwa mstari wa mbele katika kuwawezesha wananchi wayatunze mazingira sanjari na utoaji wa miche ya kupanda.

Aidha Naibu waziri aliwaomba wananchi kuwa mstari wa mbele katika utunzaji wa mazingira ili mazingira yawatunze.

“Ndugu wananchi nawaomba tuwe na utamaduni wa kupanda miti kila familia kwani jukumu la kuyatunza mazingira ni jukumu letu sote kwa faida yetu na vizazi vijavyo.” Naibu Waziri alisema.

Kwa upande wake Mwenyekiti wa Halmashauri ya Chalinze,Mheshimiwa Hassani Mwinyikondo alizipongeza taasisi za Dstv na UN Global Compact kwa kuwa wazalendo wa kweli kwa kuunga mkono Juhudi za serikali ya awamu ya sita katika kuyatunza na kuyalinda mazingira,pia aliziahidi taasisi hizo kuzipatia ushirikiano wa hali ya juu katika kuboresha mazingira katika halmashauri ya Chalinze.

Kwa upande wake Meneja wa benki ya CRDB Kibaha, Bi Rose Kazimoto aliahidi kutoa ushirikiano mkubwa katika kuyalinda na kuyatunza mazingira kupitia taasisi yake,pia aliwaahidi wananchi upatikanaji wa huduma za kibenki kupitia taasisi yake muda si mrefu kuanzia sasa kwani wapo hatua za mwisho kukamilisha ujenzi wa benki tawi la Chalinze.