Elimu Dhidi ya Kichaa cha Mbwa yatolewa Chalinze

Imewekwa: September 28th, 2022

Halmshauri ya Wilaya ya Chalinze yaadhimisha Siku ya Kichaa cha Mbwa Duniani

Halmshauri ya Wilaya ya Chalinze  leo imeadhimisha siku ya Kichaa cha Mbwa Duniani katika viwanja vya shule ya Msingi Chalinze kata ya Pera kwa kutoa elimu kwa jamii na wanafunzi kuhusu ugonjwa huo pamoja na kutoa chanjo bure kwa mbwa na paka.

Maadhimisho hayo yanayofanyika kila mwaka yamefunguliwa rasmi  na Mhe.Nasser Karama Diwani wa kata ya Bwilingu kwaniaba ya Mwenyekiti wa Halamshauri ya Wilaya ya Chalinze ambapo amesema kuwa ni mafanikio makubwa kwa Serikali na Halmashauri kwa kuandaa maadhimisho hayo kwa kutoa  elimu ya kichaa cha mbwa kwa wanafunzi kwani itawasaidia kuchukua tahadhari ili kuepukana na kichaa cha mbwa.

“ Maadhimisho haya ya kichaa cha Mbwa Duniani ni mafanikio makubwa kwa Serikali na Halmashauri kwa ujumla kupitia idara ya mifugo kwa kuandaa maadhimisho haya shuleni kwani hatari nyingi na madhara ya kichaa cha mbwa yanawakumba sana vijana wetu waliopo mashuleni hivyo basi elimu iliyotolewa hapa itawasaidia wanafunzi na jamii kwa ujumla kujikinga na madhara haya ya ugonjwa”. Amesema Mhe.Nasser.

Hata hivyo Mhe Nasser aliendelea kwa kuwaasa wananchi kuwaleta mbwa wao katika maadhimisho hayo nakuwa na utaratibu wa kuwapatia wanyama hao chanjo ili kuilinda jamii dhidi ya kichaa cha mbwa kwani kufuga mbwa ni hiari bali kumpatia chanjo ni lazima.

Aidha kwaniaba ya wananchi wa Kata ya Pera Diwani wa kata  hiyo Mhe.Jackson Mkango amesema kuwa wananchi wa kata ya  Pera wamepata uelewa mkubwa juu ya kichaa cha mbwa pamoja na kutambua kuwa jukumu la utunzaji wa mbwa kwa mfugaji ni lazima.

“Kwaniaba ya wananchi wa kata ya Pera tunaishukuru Halmashauri ya Wilaya ya Chalinze kwa kuichagua kata yetu ya Pera kuwa  sehemu ya kutoa elimu kwenye maadhimisho haya na pia tumepata kujua kuwa ufugaji wa mbwa ni hiari lakini kwa miongozo ya serikali utunzaji wa mbwa hasa kuwapatia chanjo ni lazima”,Amesema Mhe. Mkango.

Nae Afisa Mifugo wa Halmashari ya Wilaya ya Chalinze Ndg.Msongo Songoro ameelezea lengo kuu la maadhimisho haya ya Kichaa cha mbwa Duniani kwa Halmashauri ya Wilaya ya Chalinze ni kuipa jamii elimu juu ya kuwatunza vyema mbwa na paka pamoja na namna ya kujikinga na mbwa ambao wanaweza kuhatarisha afya kwa jamii.

“Lengo la maadhimisho haya ni kuipa jamii elimu kwa kutunza mbwa na paka vizuri pamoja na kuwahudumia ili wasiweze kupata ugonjwa huu kwani mbwa na paka wakipata ugonjwa huu wanaweza kuleta maambukizi ya kichaa cha mbwa kwa binadamu endapo atang’atwa na mbwa aliyeathirika”Amesema Ndg.Msongo

Vilevile ndugu Msongo amewataka wananchi wanaofuga wanyama hao  kuwafikisha katika ofisi za kata ili waweze kupatiwa chanjo bila malipo.