Elimu ya Ulinzi na Usalama wa Mtoto yatolewa Chalinze

Imewekwa: March 5th, 2019

Halmashauri ya Wilaya ya Chalinze kupitia Idara ya afya na usitawi wa jamii imetoa mafunzo ya ulinzi na Usalama wa mtoto katika shule za msingi za Chalinze na Pingo zilizopo katika Kata ya Pera, Kwa mujibu wa Afisa Ustawi wa halmashauri ya Chalinze Bi Mercy Mwambasi mafunzo hayo yamefanyika jana na yanaendeshwa kwa mujibu wa sheria ya Mtoto namba 21 ya mwaka 2009 inayotaka mtoto alindwe na apatiwe haki zake za msingi kwa mujibu wa sheria.

      Mwambasi alieleza kuwa katika mafunzo hayo yanayolenga kuwajengea uwezo watoto wa shule za msingi na Sekondari yanawawezesha kutambua mtoto ni Nani kwa mujibu wa sheria za Tanzania ambazo zinaeleza wazi kuwa mtoto ni mtu yeyote mwenye umri chini ya miaka 18.

      Afisa ustawi aliendelea kufafanua kuwa katika mafunzo hayo watoto wameweza kuelewa dhana ya ulinzi na Usalama wa mtoto kuwa ni kitendo cha kumlinda mtoto dhidi ya vitendo vyote vya kikatili vinavyoathiri makuzi na maendeleo ya mtoto.

      Aidha katika mafunzo hayo maafisa ustawi wameweza kueleza aina za ukatili wanazoweza kufanyiwa watoto katika jamii kama ukatili wa kijinsia,kimwili,kisaikolojia,na kingono.

     Kwa upande wake Afisa ustawi wa Jamii Bi Shukuru Mgao aliwafundisha watoto haki zao kwa mujibu wa sheria ya Mtoto ya mwaka 2009 ikisomwa pamoja na katiba ya Jamhuri ya muungano wa Tanzania ya mwaka 1977 kuwa mtoto ana haki ya kuishi,kulindwa,kucheza,kupata elimu,matibabu,mavazi,chakula na kupumzika. Pamoja na haki hizo kwa mtoto,mtoto pia anawajibu kwa jamii au Familia kama kusoma na kuwatii wazazi au walezi wao kwa majukumu ya msingi wanayopewa na wakubwa.

      Naye Mratibu wa wahudumu wa afya ya jamii,Dkt Bwire John katika mafunzo hayo alitoa maada akiwaelekeza namna ya kujihami kama watafanyiwa ukatili wa aina yeyote au wakiona mwenzao anafanyiwa ukatili watoe taarifa kwa wazazi,walimu,watendaji wa vijiji au kata,kituo cha polisi au ofisi za ustawi wa jamii au wapige simu namba 116 ambayo ni namba ya bure watapata msaada mara moja.

      Mafunzo haya ni endelevu na yanaendelea kutolewa katika shule zote za msingi katika halmashauri ya Chalinze.