Fanyeni Kazi kwa Bidii Kukamilisha Miradi ya Uviko- 19 kwa wakati: Mh. Mwinyikondo

Imewekwa: December 25th, 2021

Mwenyekiti wa Halmashauri ya Chalinze Mh:Hassani Mwinyikondo ameacha kusherekea sikukuu ya  Chrismas na kufanya ziara ya ukaguzi wa Madarasa ya  uviko 19 akiambatana na jopo la Wataalam wa Halmashauri hiyo ili kukimbizana na muda uliobaki wa ukamilishaji wa majengo hayo.

Katika ziara hiyo Mh: Mwinyikondo amefanikiwa kutembelea jumla ya miradi mitano ya maendeleo iliyopo katika kata tofauti, ambazo ni pamoja na Shule ya Sekondari Kibindu, Shule Shikizi ya Komtonga, Shule ya Sekondari Kimange, Shule ya Sekondari Rupungwi na Shule ya Sekondari Changalikwa ambapo miradi hiyo yote ilipelekewa jumla Tsh. Milioni 320/= kati ya     Tsh Bilioni 1.6 zilizopelekwa Halimashauri hiyo kutekeleza jumla ya ujenzi wa Vyumba vya Madarasa 80

Akizungumza katika Ziara hiyo Mh Mwinyikondo alimshukuru Rais wa Jamhuri ya Muungano wa awamu ya Sita Mh: Samia Suluhu Hassan kwa kuisaidia Halmashauri ya Chalinze kutatua tatizo la upungufu wa Madarasa, amewataka wasimamizi na mafundi wa Miradi hiyo kufanya kazi kwa bidii ili kuikamilisha kwa wakati na kufanikisha lengo kusudiwa ambalo ni kuchukuwa wanafunzi wa kidato cha kwanza mapema Januari 2022.

Ni wito wangu kwa wasimamizi wa miradi hii kwa maana ya ofisi ya Mkurugenzi, Mhandisi wa Wilaya, Maafisa Elimu(Msingi na Sekondari) na walimu wakuu, kamati za usimamizi na mafundi kufanya kazi usiku na mchana ili kuhakikisha lengo la kukamilisha miradi hii mnamo tarehe 28.12.2022 linafikiwa’. Alisema Mh  Mwinyikondo

Akihitimisha katika majumuisho ya ziara hiyo Mh. Mwinyikondo aliwapongeza wataalam na wajumbe wote walioonyesha uzalendo na kuungana nae katika ziara hiyo japo ilikuwa ni sikukuu na kuwataka waendelee hivyo. Aidha alimuagiza Afisa Mipango kuona namna ambavyo anaweza kupeleka fedha katika miradi kwa wakati hasa katika ujenzi wa vyoo kwenye shule zilizo bahatika kupata fedha za madarasa ya UVIKO 19 ili kusaidia ukamilikaji wake kwa wakati.