FASAT waweka kambi viwanja vya Msoga kwa siku tatu ili kutoa elimu na msaada wa kisheria kwa wananchi

Imewekwa: June 27th, 2024

Ikiwa zimebaki siku mbili kabla ya Mbio za  Msoga Marathon zinazotarajiwa kufanyika Juni 29 ,2024 Shirika lisilo la kiserikali la Foundation for Anti-sexual abuse in Tanzania (FASAT) limeweka kambi ya siku tatu katika Halmashauri ya wilaya ya Chalinze katika viwanja vya  Msoga kwa na lengo la kutoa msaada na elimu ya sheria pamoja na kuhamasisha  wananchi kujitokeza kwa wingi siku hiyo ikiwa ni katika harakati ya kuunga mkono jitihada za Halamshauri ya Chalinze.

Hayo yamesemwa na Mkurugenzi mtendaji wa Shirika la FASAT Bi Stella Lukumay leo Juni 27,2024 alipokuwa akifanya mahojiano na kituo cha Chalinze fm kwenye kipindi cha Gumzo leo kinachoruka Jumatatu hadi Ijumaa kuanzia saa 04:00 asubuhi hadi saa 07:00 mchana kwa lengo la kuhamasisha wananchi kujitokeza kwa wingi kushiriki mbio za Msoga Marathon ikiwa ni sehemu ya kuonyesha upendo kwa mama na mtoto.

Kadhalika Bi Stella ametaja lengo kubwa la FASAT ni pamoja na kutekeleza mradi wake wa HERCARE katika kupinga na kukemea ukatili wa kijinsia na kutoa msaada wa afya ya akili ili  muhanga aweze kukabiliana na janga alilokumbana nalo na kumpa Elimu ya ujasiliamali na kilimo biashara.

Pia Mkurugenzi  mtendaji wa FASAT ametoa wito kwa jamii kujitokeza kwa wingi ili waweze kupata huduma zinazotolewa na kusema kuwa watakao fika na kuhitaji msaada wa kisheria watapata elimu bure dhidi ya ukatili wa kijinsia ili jamii kwa ujumla iweze kuondokana  na tamaduni zinazo mnyanyasa mwanamke na mtoto. Aidha zoezi hilo limeanza leo Juni 27, 2024 huduma zinaanza saa  04:00 asubuhi hadi saa 12:00 jioni na linatarajia  kutamatika Juni 29.