Halmashauri tatu za mkoa wa Pwani zashiriki kikao cha mradi wa Kwala

Imewekwa: March 6th, 2023

Halmashauri tatu Mkoa wa Pwani zashiriki Kikao maalumu cha kupanga,kuanzisha na kuendeleza jiji la kibiashara na uwekezaji Kwala Mkoani Pwani.

Kikao hicho kimehudhuriwa na Mgeni rasmi  Katibu Tawala Mkoa wa Mkoa wa Pwani Bi Zuwena Omary, Madiwani,Wakurugenzi wa Halmashauri za Chalinze,Kibaha na Kisarawe pamoja na wataalamu kutoka Ofisi za Ardhi.

Akihutubia katika kikao hicho mgeni rasmi Katibu Tawala wa Mkoa wa Pwani Bi Zuwena Omary amesema amewaomba madiwani kuwa mstari wa mbele kuwahimiza wananchi kuwa sehemu ya uendelezaji wa jiji la Kwala.

"Niwaombe waheshimiwa Madiwani mkawe mstari wa mbele kuwahimiza Wananchi wenu wawe sehemu ya uendelezaji wa jiji la kwala ili wanufaike na sio kuwa watu wakuuza adhi zao kwa wageni ambao watamiminika katika eneo hili kubwa la kibiashara na uwekeza kwani ndio dhamira ya Rais wetu Mhe.Samia Suluhu Hassan."Amesema Bi. Zuwena.

Nae Mwenyekiti wa Kikao hicho Mhe.Hassan Rajabu Mwinyikondo ambaye pia ni Mwenyekiti wa Halmashauri ya Wilaya ya Chalinze kwaniaba ya madiwani wote amesema kuwa wameridhishwa na kuunga mkono jitihada za Serikali za kuanzisha jiji hilo Mkoani Pwani.

"Kwaniaba ya madiwani wenzangu niseme tu tumeridhia na tunaunga mkono jitihada za Serikali na za Rais wetu mpendwa Mhe. Samia Suluhu Hassan za kuanzisha jiji hili hapa mkoani Pwani." Amesema Mhe.Mwinyikondo.

Aidha Mwenyekiti wa Kamati ya Kupanga ,kuanzisha na kuendeleza jiji la kibiashara Kwala ndg.Lucus Malunde kutoka Ofis ya Rais TAMISEMI amesema kuwa jiji hilo la kwala litakuwa jiji kubwa Tanzania ikiwa ni jiji mbadala wa jiji la Dar es Salaam ambalo limejaa hivyo basi jiji hilo litakuwa na fursa nyingi kwani mpaka sasa huduma nyingi muhimu zimeanza kupelekwa kama vile maji,umeme,minara ya mawasiliano pamoja na majengo makubwa ya kibiashara na makazi.

Ikumbukwe kuwa jiji hilo linalotarajiwa kuanzishwa lina ukubwa wa ekari 103,083 na limejumuisha baadhi ya vijiji kutoka Halmashauri tatu yaani Halmashauri ya Chalinze vijiji 9,Halmashauri ya Kibaha vijiji 16 na Kisarawe vijiji 5.