Halmashauri ya Chalinze na Ruangwa yaanzisha urafiki wa kikazi.

Imewekwa: February 9th, 2022

Halmashauri ya Wilaya ya Chalinze na Halmashauri ya Ruangwa wameanzisha uhusiano na urafiki wa kikazi ikiwa na lengo la ushirikiano katika sekta mbalimbali za kimaendeleo baina ya Halmashauri hizo mbili.

Hayo yametokana na ziara fupi ya Mwenyekiti na Mkurugenzi Mtendaji wa Halmashauri ya Ruangwa ambapo Mwenyekiti wa Halmashauri hiyo Mhe.Endrew Chikomwe na Mwenyekiti wa Halmashauri ya Chalinze Mhe. Hassan Mwinyikondo  na wakurugenzi wa Halmashauri zote mbili wamekubaliana  kuanzisha ushirikiano huo hata kwa maandishi ili kuleta maendeleo katika Halmashauri hizo.

Ambapo Mwenyekiti wa Halmashauri ya Ruangwa Mhe.Endrew Chikomwe amewaeleza baadhi ya watendaji wa Halmashauri ya Chalinze kuwa ushirikiano utaibua maendeleo Zaidi baina ya Halmashauri hizo,

“ Kwaniaba ya Halmashauri ya Ruangwa Nimezungumza na Mwenyekiti Mwenzangu na Mkurugenzi kuanzisha urafiki huu baina ya Halmashauri zetu utakaolenga kufanya na kupanga mikakati ya kimaendeleo katika sekta mbalimbali katika Halmashauri zetu hizi na pia kujifunza kwa kila mmoja wetu pale ambapo amefanikiwa jambo”. Alisema Mhe. Chikomwe.

Aidha Mkurugenzi Mtendaji wa Halmashauri ya Ruangwa Ndg. Frank Chonya ameipongeza Halmashauri ya Wilaya ya Chalinze kwa kuwa na jingo zuri pamoja na ukumbi na kuahidi kujifunza kupitia Halmashauri hiyo

“Kwanza tumefurahi kufika hapa Chalinze  na tumefurahishwa jinsi mlivyotupokea mimi na Mheshimiwa Mwenyekiti wangu , na niwapongeze kwa kuwa na jingo zuri sana na ukumbi uliopangiliwa vizuri basi nasi tumejifunza ni kwa namna gani tutapangilia jengo letu jipya.” Alisema Ndg.Chonya.

Kwa upande wa Halmashauri ya Chalinze kupitia Mwenyekiti wake Mhe.Hassan Mwinyikondo ameahidi ushirikiano mkubwa baina ya Halmashauri ya Chalinze na Halmashauri ya Ruangwa ,

“Kwa niaba ya Halmashauri ya Chalinze niseme kuwa tumefurahishwa na ujio wenu hapa kwetu na tunaahidi kuwa na ushirikiano mkubwa baina yenu na yetu kwani itasaidia kuleta maendeleo kwenye Halmashauri zetu na Taifa kwa ujumla kwa kujifunza pale walipofanikiwa wenzetu.” Alisema Mhe. Mwinyikondo.

Mhe. Mwinyikondo ameongeza kwa kuwataka baadhi ya maafisa wa idara  wa Halmashauri ya Chalinze kufanya ziara ya kujifuza yale mazuri katika Halmashauri ya Ruangwa ikiwepo idara ya kilimo pamoja na idara ya Elimu yaani Elimu Msingi na Elimu sekondari.