Halmashauri ya Chalinze yafanya Mkutano wa Baraza la kufunga mwaka 2021/2022

Imewekwa: August 25th, 2022

Halmashauri ya Wilaya ya Chalinze  imefanya Mkutano wa Baraza la MadiwanI la Mwaka kwa mwaka wa fedha 2021/2021 katika ukumbi wa Mikutano wa Kikwete ambapo mkutano huo umelenga kupokea taarifa za utekelezaji wa Shughuli mbalimbali za Halmashauri zilizofanyika katika kipindi cha Julai 2021-juni 2022 sanjari na hilo ni pamoja na kufanya uchaguzi wa Makamu Mwenyekiti wa Halmashauri pamoja na Uchaguzi wa Wenyeviti na Wajumbe wa kamati za kudumu za Halmashauri.

Mara baada ya Kikao hicho Naibu Waziri wa Ardhi,Nyumba na Maendeleo ya Makazi ambaye pia ni Mbunge wa Jimbo la Chalinze Mhe. Ridhiwani Kikwete alipata wasaa wa kuzungumza na Waheshimiwa Madiwani pamoja na Watendaji wa Halmashauri ya Wilaya ya Chalinze kwa lengo la kuwakumbusha wajibu wao wa kuwahudumia wananchi wanaowawakilisha ambapo amesema

“Lengo kubwa la kukutana na kuzungumza na Waheshimiss Madiwani wenzangu ni kukumbushana juu ya wajibu wetu ni kuhakikisha tunayafikia matamanio ya wananchi wetu kwasababu kwenye upangaji wa maendeleo ya Halmashauri Baraza la madiwani ni sehemu kubwa ya kuhakikisha tunayafikia malengo hayo”. Naibu Waziri alisema.

Vilevile Mheshimiwa Ridhiwani amewaomba Waheshimiwa Madiwani kuorodhesha miradi ambayo haijakamilika na ile ambayo haikufikiwa kanisa pamoja na kuorodhesha vipaumbele vyote vya wananchi katika maeneo hayo ili kuanza kuvifanyia kazi kwa haraka.

Naye Mwenyekiti wa Halmashauri ya Wilaya ya Chalinze Mhe. Hassan Mwinyikondo amewataka Waheshimiwa madiwani kuendeleza ushirikiano ili kuweza kuijenga chalinze hasa kwenye eneo la ukusanyaji wa mapato

Hata hivyo katika kikao hicho Mhe.Mwinyikondo ameelezea namna wanavyotekeleza mikakati ya kampeni ya kuhakikisha kila mwanachalinze anahesabiwa katika zoezi zima la Kitaifa la Sensa ya watu na makazi.

“ Kwakutambua umuhimu wa Sensa ya Watu na Makazi kwa Taifa letu na ili kumuunga Mkono Rais wetu Mhe Samia Suluhu Hassan Halmashauri ya Wilaya ya Chalinze inahakikisha haachwi mtu kwenye kuhesabiwa na ndio maana hatulali usiku na mchana ili kupita nyumba kwa nyumba ili kuhakiki na kujiridhisha kuwa kila mtu amehesabiwa”. Mhe. Mwinyikondo alifafanua

Mhe. Mwinyikondo aliendelea kwa kusema kuwa Halmashauri ya Chalinze imefanya vikao mbalimbali na Wenyeviti wa Vitongoji wote na pia kutengeneza kamati ndogo ya Sensa kwa halmashauri ukiacha ile ya Wilaya inayoongozwa na Mkuu wa Wilaya ili kuhakikisha zoezi la Sensa linafanikiwa.

Mkutano wa Kikao hicho cha Mwaka hukaliwa kila mwisho wa mwaka wa fedha ili kupata taarifa za  utekelezaji wa miradi mbalimbali ya kila mwaka wa fedha ndani ya Halmashauri.