Halmashauri ya Chalinze yapata mgao wa Zaidi ya Bil 1.6

Imewekwa: October 22nd, 2021

Halmashauri ya Wilaya ya Chalinze ni moja kati ya Halmashauri 184 za Tanzania Bara ambazo zimebahatika kupata kiasi cha fedha Shilingi Bilioni 1.68 kutoka katika sehemu ya shilingi bilioni 535.68 ambayo ni asilimia 41.1 zilizoelekezwa katika Wizara ya TAMISEMI zilizotokana na mkopo wenye masharti nafuu wa Shilingi trilioni 1.3 za Kitanzania  kutoka Shirika la Fedha la Kimataifa (IMF) kwa ajili ya Kampeni ya Maendeleo kwa Ustawi wa Taifa na Mapambano dhidi ya UVIKO-19 ili kuchangia kufufua uchumi kwa Sekta zilizopata athari za kiuchumi kutokana na madhara ya UVIKO-19 nchini Tanzania.

Akizungumza kwaniaba ya Mkurugenzi Mtendaji, Mwenyekiti wa kikao hicho cha utekelezaji Ndg Shabani Millao ambaye ni Afisa Mipango, Tkwimu na Ufuatiliaji (W) alitoa shukrani kwa Rais wa Jamhuri ya Muungano wa Tanzania kwa jitihada zake za kupata fedha hizi na alifafanua mchanganuo wa miradi ambayo itafikiwa na fedha hizo.

“ Nipende kumshukuru Rais wetu wa Jamhuri ya Muungano wa Tanzania Mhe. Samia Suluhu Hassan kwa jitihada zake na upendo wake kwa Watanzania mpaka kupata fedha hizi kwa maendeleo ya wanaChalinze na Watanzania kwa Ujumla, Halmashauri ya Chalinze  imepokea kiasi cha Shilingi Bil 1,680,000,000/= ikiwa gharama na maeneo yafuatayo yatafikiwa ikiwemo shilingi 1.320,000,000/= kwa ajili ya ujenzi wa vyumba vya madarasa 66 katika shule za sekondari ili kuweza kupokea wanafunzi wote wa kidato cha kwanza kwa mwaka 2022 ambavyo ndivyo vilivyokuwa uhitaji halisi kwa Halmashauri yetu. Ujenzi wa madarasa huo unaenda sambamba na utengenezaji wa viti na meza kwa vyumba vyote ambavyo vitafikia idadi ya 3300, pia shilingi 280,000,000.00/₌ kwa ajili ya ujenzi wa vyumba vya madarasa 14 kwa shule (vituo) shikizi vitano na shilingi 80,000,000/= itatumika kwa ajili ya ujenzi wa Bweni la watoto wenye mahitaji maalumu kwa shule ya msingi Chalinze”.Alisema Ndg. Shaban Milao.

Aidha  katika taarifa ya Mpango huo Halmashauri imepatiwa mgao wa magari mawili moja likiwa la gari ya Wagonjwa na gari la usimamizi wa huduma za Afya na imepata mgao wa Mashine moja ya Mionzi (X-Ray) ambayo itatumika kusaidia kutoa huduma katika Halmashauri ikiwa na thamani ya Shilingi 420,000,000/=

Kikao hicho cha mkakati wa utekelezaji kimehudhuriwa na Wakuu wa Idara wa Halmashauri ya Wilaya ya Chalinze pamoja na wakuu wa shule mbalimbali zilizopo katika Halmashauri ya Chslinze.