Halmashauri ya Chalinze yapatiwa gari la wagonjwa

Imewekwa: February 29th, 2020

Halmashauri ya wilaya ya Chalinze Mkoani Pwani leo imepatiwa gari la wagonjwa na wizara ya Afya,Maendeleo ya Jamii ,Wazee na Watoto. Makabidhiano hayo yamefanyika jijini Dar es salaam.

Gari hilo la wagonjwa limetolewa na wizara kwa ajili ya shughuli za dharura na maafa kwa baadhi ya halmashauri nchini Tanzania ikiwemo Chalinze. Akieleza Mganga Mkuu wa Halmashauri ya wilaya ya Chalinze,Dkt Kyungu amesema gari hili limetolewa na wizara ya Afya kwa kazi za dharura na ukoaji maafa mbalimbali yanayoweza kujitokeza katika halmashauri ya Chalinze.”Tunaishukuru wizara ya Afya kwa kuikumbuka halmashauri yetu na kuipatia gari hili ambalo litakuwa msaada mkubwa kwa wanachalinze na watanzania katika kuwezesha wagonjwa kufika katika huduma za afya kwa wakati hususan akina mama wajawazito na watoto chini ya miaka mitano.”Dkt Kyungu alifafanua.

Katika mapokezi ya gari hilo la wagonjwa yalishuhudiwa na Mbunge wa Jimbo la Chalinze,Mheshimiwa Ridhiwani Kikwete. Kikwete ameishukuru serikali ya awamu ya tano chini ya Dkt John Pombe Magufuli kwa kuwajali wananchi wa Chalinze na kuwapatia gari hili jipya kwa shughuli za dharura na maafa.” Kipekee niishukuru Wizara ya Afya kwa jitihada zake kuhakikisha wanachalinze wanafika katika vituo vya Afya kwa wakati bila kuchelewa na kupata huduma za afya,nimshukuru Rais Magufuli kwa kuwajali wananchi wangu.” Mbunge alieleza.

Naye Mwenyekiti wa halmashauri ya Chalinze Mheshimiwa Saidi Zikatimu akizungumza na Msemaji wa Halmashauri kwa niaba ya Baraza la madiwani aliishukuru serikali ya awamu ya tano kwa kuboresha huduma za afya ikiwa ni pamoja na Wizara kuipatia gari la wagonjwa ambalo litaokoa maisha ya wananchi wa Chalinze na watanzania kwa ujumla.