Halmashauri ya Chalinze yaweka mikakati kufanikisha zoezi la sensa

Imewekwa: August 22nd, 2022

Halmashauri ya Chalinze yajipanga kwa sensa ya watu na makazi

Halmashauri ya Chalinze kwa kushirikiana na kamati ya sensa wilaya ya Chalinze imehitimisha hamasa za sensa kwa kukutana na watendaji wa kata zote 15 za halmashauri ya Chalinze na watendaji wa vijiji vyote 74 katika halmashauri ya Chalinze na kuweka mikakati ya kufanikisha zoezi la sensa ya watu na makazi .

Kikao hicho kimefanyika katika ukumbi wa Jakaya Kikwete uliopo katika makao makuu ya halmashauri ya Chalinze na kuweza kutoa elimu ya sensa na kutoa ufafanuzi wa masuala mbalimbali yanayoweza kuwa kikwazo katika zoezi la sensa ya watu na makazi. Kikao hicho kiliongozwa na Mwenyekiti wa Halmashauri ya Chalinze Mheshimiwa Hassani Mwinyikondo.

Mwinyikondo akiongoza kikao cha watendaji wa kata na vijiji aliwatakanwatendaji hao kusimamia zoezi kwa weledi wa hali ya juu na kuwa na uwazi pasipo kuficha ficha mambo na kuwa na mawasiliano ya mara kwa mara panapokuwa na changamoto ili kuzitatua kwa wakati na zoezi liweze kuendelea pasipo vikwazo vyovyote.

             “Sisi wanachalinze utamaduni wetu ni kufanya kazi kama timu na hatujawahi kushindwa jambo na hatutegemei kushindwa jambo,hivyo uzalendo uendelee kuchukua nafasi yake na zoezi likakamilike kwa ubora unaotakiwa,Mimi nipo tayari  kuhesabiwa wewe je?.” Mwinyikondo alisema.

Kwa upandewake Mkurugenzi Mtendaji wa Halmashauri,Ramadhani Possi ametoa wito kwa watumishi wote na wanachalinze kushiriki katika zoezi hili na kutoa ushirikiano kwa makarani kwa kutoa taarifa sahihi kwa maendeleo ya taifa .