Halmashauri ya Wilaya Chalinze yafanya Dua kumuombea Hayati Dkt John Pombe Joseph Magufuli na Rais wa Tanzania Mhe. Samia Suluhu Hassan.

Imewekwa: April 7th, 2021

Uongozi wa Halmashauri ya Wilaya Chalinze chini ya Mwenyekiti wake Mhe. Geofrey Kamugisha na Mkurugenzi Mtendaji Ndg. Ramadhani Possi kwa kushirikiana na Kamati ya Amani ya wilaya ya Bagamoyo tarehe 07.04.2021 katika ukumbi wa Halmashauri wamefanya maombi maalumu kwa ajili ya Kumuombea alikuwa Rais wa Jamhuli ya Mungano wa Tanzania Hayati Dkt. John Pombe Joseph Magufuli.

Akizungumza katika hafla hiyo Mwenyekiti wa Halmashauri Mhe. Kamugisha aliwashukuru wajumbe wote ambao ni viongozi wa Dini ya Kikristo na Kiislamu kwa kufika kwao na kuwaelezea adhima ya hafla hiyo. Mwenyekiti alisema,"Napenda kuwashukuru sana sana wajumbe wote kwa kufika kwenu, lengo kubwa la sisi kukutana hapa ni kufanya maombi maalumu kwa ajili ya aliyekuwa Rais wa Jamhuri ya Muungano wa Tanzania Hayati Dkt. John Pombe Joseph Magufuli ili Mungu amrehemu na kumuhepusha na adhabu ya mauti. Sio hivyo tu bali na kumuombea Rais wa awamu ya sita Mhe. Samia Suluhu Hassan ili Mungu ampe nguvu, Ujasiri, Amani na Uwezo katika kutekeleza majukumu yake ya Urais alioupokea.

Aidha, Mhe. Kamugisha aliongeza kusema, "Halmashauri ya Chalinze itaendelea kumuenzi Hayati John Pombe Magufuli kwa vitendo kwa kufanya kazi na kutekeleza miradi mikakati yote ambayo ilianzishwa na Halmashauri ya Chalinze katika awamu yake, na kusimamia rasilimali za wananchi ili kuleta maendeleo katika Halmashauri ya Wilaya Chalinze na Taifa kwa ujumla.

Mhe. Kamugisha alihimiza viongozi wa dini kuendelea kuhamasisha Amani ndani ya Chalinze na Taifa kwa ujumla ili nchi iwe salama kwa wananchi na wawekezaji kuishi. Alisema, "Ndugu wajumbe wa hafla hii na Kamati ya Amani ya Wilaya (viongozi wa dini ya Kiislamu na Kikristo pamoja na waumini wao) napenda kutoa wito kwenu kuendelea kuhamasisha Amani, Upendo na mshikamano kwa waumini wenu muwapo katika ibada  ili kuongeza kasi ya kulijenga Taifa lenye utulivu. Mhe. Kamugisha aliongeza, "Kama viongozi tunapenda kuwahakikishia kuwa kazi zinaendelea hata baada ya kuondokewa na Aliyekuwa Rais Hayati Dkt. John Pombe Joseph Magufuli kwa kuwa sasa tunaye Rais Imara ba Shupavu Mh. Samia Suluhu Hassan. Kikubwa tuzidi kumuombea ili yale yote mema ambayo Mungu amekusudia tuyapate kupitia yeye basi yakafanyike kwa wakati".

Alisema Halmashauri inaendelea na Utaratibu wa uimarishaji wa vyanzo vya mapato ikiwa ni pamoja na uibuaji wa vyanzo vipya na uendelezaji wa Miradi mikakati kama Ujenzi wa Stadi, Soko, Sehemu ya maegesho ya Magari Makubwa, Ujenzi wa kumbi za mikutano au sherehe na Ununuzi wa Greda ili kufungua barabara kuchangia katika jitihada za TARURA. Na kuwa hivyo vyote vina lengo la kuongeza pato la Halmashauri na kusaidia katika utekelezaji wa Mambo mengi ya kimaendeleo ambayo yatagusa maisha ya mwanachalinze mmoja mmoja.

Naye Mwenyekiti wa kamati ya amani kwa niaba ya viongozi wa dini Ndg. Alhaji Khamis Nassoro alisema Hayati Magufuli alikuwa ni kiongozi wa mfano kwani alifanikiwa kuunganisha watu wa dini zote. Katika kipindi cha uongozi wake, hapakuwahi kutokea hata migogoro ya kidini baina ya Wakristo na Waislamu. Pia, alisema yapo mambo mengi aliyowaahidi wanachalinze ikiwemo uboresha wa miundombinu ya maji, barabara, Masoko na Viwanda na kuifanya Chalinze iwe kama Singapore jambo ambalo halikukamilika mpaka mauti yanamfika. "Tuna imani na Rais aliopo madarakani Mhe. Samia Suluhu Hassan kuwa ataendeleza pale alipoishia Hayati Dkt. Magufuli".

Aliwataka wananchi wa Chalinze kuendelea kuishi maisha ya kumtumaini Mungu na kuzidisha dua kwani ndio njia pekee itakayowaweka tayari kufika mwisho mwema wa maisha yao katika dunia hii. Katika kuhitimisha Ibada hiyo maalum ya kumuombea aliyekuwa Rais wa Tanzania Hayati Dr. John Pombe Magufuli, Rais wa sasa Mhe. Samia Suluhu Hassan na Halmashauri ya Wilaya Chalinze iliyoendeshwa na viongozi wa dini wa pande zote yaani Wakristo na Waislamu, viongozi hao walimuomba Mungu kumpa pumziko la amani Hayati Magufuli na kumuombea Afya njema, hekima, Upendo na Uvumilivu Rais wa awamu ya sita Mhe. Samia Suluhu Hassan ili aweze kuiongoza vema Tanzania na kuzidisha kasi ya ukuaji wa kiuchumi.