Halmashauri ya wilaya ya Chalinze Kinara Mbio za Mwenge wa Uhuru Kitaifa 2022

Imewekwa: October 14th, 2022

Halmashauri ya wilaya ya Chalinze Mkoani Pwani imeshika nafasi ya kwanza kitaifa katika Mbio za Mwenge wa Uhuru Kitaifa 2022.

Halmashauri hiyo imeshika nafasi ya kwanza kitaifa kwa kukidhi vigezo vyote vya mbio za Mwenge wa Uhuru kwa mwaka 2022 na kuziongoza Halmashauri zote nchini zipatazo 195 bara na visiwani kwa maana ya Majiji,Manispaa,Miji na Halmashauri za Wilaya nchini.

Akitangaza Matokeo hayo katika hafla ya kilele ya mbio za Mwenge wa Uhuru kitaifa katika uwanja wa Kaitaba,Manispaa ya Bukoba Mkoani Kagera,Waziri wa Nchi Ofisi ya Waziri  Mkuu Sera,Bunge,Kazi,Ajira,Vijana na Watu wenye Ulemavu,Profesa Joyce Ndalichako alisema Halmashauri iliyoongoza katika Mbio za Mwenge wa Uhuru kwa maana ya Mshindi wa jumla ni Halmashauri ya Wilaya ya Chalinze Mkoani Pwani.

“ Halmashauri iliyoongoza kwa matokeo ya Jumla ngazi ya Taifa ni Halmashauri ya Wilaya ya Chalinze Mkoani Pwani,hongera Chalinze kwa kukidhi vigezo vya ushindani kwa mwaka 2022.” Ndalichako alisema.

Katika hotuba yake Rais wa Jamhuri ya Muungano wa Tanzania,Mheshimiwa Samia Suluhu Hassan aliipongeza Halmashauri ya Wilaya ya Chalinze kwa kuwa Mshindi wa kitaifa sanjari na kuzipongeza Halmashauri zingine zilizopata ushindi ngazi ya kanda.

“ Hongera Halmashauri zote zilizofanya vizuri katika Mbio za Mwenge wa Uhuru mwaka 2022 mmeweza kuzingatia vigezo stahiki vyote nawapongeza sana.” Rais Samia alipongeza.

Halmashauri ya Wilaya ya Chalinze ni Halmashauri iliyo katika wilaya Bagamoyo,Mkoani Pwani. Ni Halmashauri iliyoanzishwa Julai 2016 na kuwa miongoni mwa Halmashauri ya tisa Mkoani Pwani,Halmashauri hii imekuwa na Historia ya kufanya vizuri katika utekelezaji wa miradi ya Maendeleo sanjari na kukidhi vigezo vya mbio za Mwenge,mwaka 2017 Halmashauri hii Ilikuwa Mshindi wa kwanza kitaifa pia katika Mbio za Mwenge wa Uhuru,Mwaka 2018 Halmashauri ya Chalinze ilikuwa Mshindi wa kwanza kanda ya tano.