Mkuu wa Mkoa wa Pwani Mhe. Abubakar Kunenge azindua rasmi CHALINZE JOGGING CLUB.

Imewekwa: October 9th, 2021

Mkuu wa Mkoa wa Pwani Mhe. Abubakar Kunenge hii leo amezindua rasmi (Chalinze Jogging Club) katika bonanza lililoandaliwa na Ofisi ya Mkuu wa Wilaya ya Bagamoyo kwa kushirikiana na Ofisi ya Mbunge wa jimbo la Chalinze na Halmashauri ya Chalinze.

Akizungumza mara baada ya Shughuli ya uzinduzi Mheshimiwa Mkuu wa Mkoa  amewashukuru watendaji wa Chalinze kwa kuanzisha umoja huu kwani unatengeneza mahusiano mazuri.

“ Nimshukuru Mkuu wa Wilaya ya Bagamoyo Mhe. Zainabu Abdallah kwa kushirikiana na Mbunge wetu Mhe. Ridhiwani Kikwete, Mwenyekiti wa Halmashauri Mhe. Ismail Msumi pamoja na Mkurugenzi Mtendaji Ndg. Ramadhan Possi kwa kunipa heshima ya kuzindua (Chalinze Jogging Club) iliyopo Chalinze na tumepata wasaa wa kukimbia takribani kilomita 3 kutoka Ofisi za Halmashauri mpaka viwanja vya polisi na tukio hili linaakisi tamaduni za kitanzania za kujenga undugu na mahusiano mazuri kwa jamii na taasisi mbalimbali ambazo tunashirikiana nazo na pia hii ni kama muendelezo wa kauli ya  Rais wa Jamhuri ya Muungano wa Tanzania Mhe. Samia Suluhu Hassan ya kutenga siku maalumu kwaajili ya kufanya mazoezi” Alisema Mhe. Abubakar Kunenge.

Vilevile Mhe. Kunenge amewaasa Wanachalinze kuendelea kupenda kufanya mazoezi na pia kujikinga na Ugonjwa wa UVIKO-19 kwa kutumia vitakasa mikono, kunawa na maji tiririka  pamoja na kupata Chanjo ya UVIKO-19 kwani hata leo hii katika viwanja hivi  chanjo hiyo inatolewa bila malipo yeyote.

Aidha Mbunge wa jimbo la Chalinze Mhe. Ridhiwani Kikwete amempongeza Mkuu wa Wilaya ya Bagamoyo kwa kuweza kufanikisha tukio hili kubwa la uzinduzi na kuwaomba waandishi wa Habari kuendelea kumuunga mkono Mheshimiwa Mkuu wa Wilaya na Halmashauri ya Chalinze katika kutangaza miradi mbalimbali iliyopo Chalinze.

“ Kwanza nipende kumpongeza Mkuu wetu wa Mkoa wa Pwani kwa kushiriki nasi katika tukio hili kubwa na pia pongezi kwa mkuu wa Wilaya ya Bagamoyo kwa kuweza kufanikisha tukio hili, kwani tukio hili ni kubwa na ni muhimu kwa kujenga undugu na Afya kwa ujumla na pia nawaomba ndugu waandishi wa habari muendelee kumuunga mkono Mheshimiwa Mkuu wa Wilaya na Halmashauri ya Chalinze kwa kuitangaza Chalinze kupitia miradi mikubwa iliyopo ndani ya Halmashauri yetu ya Chalinze”. Alisema Mhe. Ridhiwan Kikwete(Mb).

Nae Mkuu wa Wilaya ya Bagamoyo Mhe. Zainabu Abdallah amewatangazia wananchi nchini kote kuwa kutakuwa na tamasha la kimataifa la Sanaa na Burudani litakaloanza Tar. 28/10/2021 mpaka 30/10/2021 katika Wilaya ya Bagamoyo.

“ Ninawatangazia rasmi Watanzania wote  kuwa Tar. 28/10/2021 mpaka 30/10/2021 kutakuwa na Tamasha la Kimataifa la Sanaa na Burudani ambalo linasimamiwa na Wizara ya Sanaa, Utamaduni na Michezo, hivyo basi nawaalika watanzania kwa ujumla kujumuika nasi katika Wilaya yetu ya Bagamoyo ili kujionea vivutio mbalimbali vilivyopo ndani ya Wilaya yetu ya Bagamoyo.

Hata hivyo Mhe. Zainabu Abdallah amewaalika Wanachalinze kujumuika katika muendelezo wa bonanza hilo la uzinduzi wa (Chalinze Jogging Club) ambapo uzinduzi huo unaambatana na Kukabidhi vifaa katika shule ya Msingi Chalinze(Pera) kwa watoto wenye mahitaji maalumu pamoja na Kutembelea Wodi ya kina mama katika Hospitali ya Wilaya ya Chalinze iliopo katika Kata ya Msoga, Katka bonanza hilo Michezo mbalimbali kama Mpira wa miguu, ngoma za kitamaduni na Mkesha wa burudani ya muziki vitafanyika kuhakikisha wanachalinze wanapata Burudani kwa ukamamilifu,

Mkuu wa Mkoa .Mhe. Abubakar Kunenge(wakatikati Mrefu) akiwa na Viongozi wa Wilalaya ya Bagamoyo na Halmashauri ya 

Chalinze katika bonanza la Uzinduzi wa Chalinze Jogging Club