Halmashauri za Chalinze na Bagamoyo zanufaika na mgao wa Ardhi

Imewekwa: May 26th, 2023

Serikali ya Jamhuri ya Jamhuri ya Muungano wa Tanzania kupitia Wizara ya Mifugo na Uvuvi imetoa Sehemu ya Ardhi kwa Wananchi wa Wilaya za Bagamoyo na Kibaha kutoka katika sehemu ya hifadhi ya Ranchi ya Ruvu kwa matumizi ya kilimo na mifugo.

Akizungumza hii leo katika hafla fupi ya makabidhiano ya ardhi hiyo Naibu Waziri wa Mifugo na Uvuvi Mhe. David Silinde (MB) amesema kuwa Serikali imeridhia kumega sehemu ya ardhi  ya Ranchi ya Ruvu zaidi ya ekari 5520 na kuzikabidhi kwa Wilaya za Bagamoyo na Kibaha.

“Serikali sikivu  ya Jamhuri ya Muungano wa Tanzania inayoongozwa na Rais wetu mpendwa Mhe. Samia Suluhu Hassan imeridhia kutoa sehemu ya Ardhi ya takribani ekari 5520 iliyokuwa inamilikiwa na Ranchi ya Taifa ya Ruvu na kuigawa kwa wananchi wa Halmashauri zilizopo Wilaya za Bagamoyo na Kibaha kufuatia mapendekezo ya tume shirikishi ya kutatua migogoro ya ardhi kwa kushirikiana na viongozi wa Mkoa,Wilaya na Vijiji husika kwa ajili ya matumizi ya maeneo hayo kwenye shughuli za makazi,kilimo,ufugaji na shughuli za kijamii”.Amesema Mhe. Silinde.

Mkuu wa Mkoa wa Pwani amemshukuru Rais wa Jamhuri ya Muungano wa Tanzania kwa kuridhia kutoa Ardhi hiyo kwa wananchi kwani huo ni upendo mkubwa kwa Wananchi wake.

“Niishukuru Serikali ya awamu ya Sita  chini ya Rais wetu Dkt.Samia Suluhu Hassan kwa kufanya maamuzi amabayo yanaonesha upendo kwa wananchi pamoja na kujali Maisha ya Wananchi wake hasa hili la kukubali na kuwaagiza Wizara kukabidhi Ardhi ya Serikaali kwa Wananchi kwani tunafahamu kabisa Kisheria umiliki wa Ardhi hiyo ni ya Ruvu Ranchi”.Amesema Mhe.Kunenge.

Aidha Mhe. Kunenge amemuahidi Mhe.Silinde kuwa kama Mkoa wana wajibu wa kusimamia Matumizi ya Ardhi hiyo pamoja na kutovumilia Wananchi ambao wataweza kuvamia tena maeneo ya Ranchi ya Ruvu.

Naye Mkuu wa Wilaya ya Bagamoyo Mhe.Halima Okash ameishukuru Serikali kwa maamuzi hayo kwani Wilaya ya Bagamoyo imeweza kunufaika na mgao wa Ardhi hiyo kwani Halmashauri za Wilaya hiyo yaani Chalinze na Bagamoyo zimepatiwa zaidi ya Ekari 4020 katika vijiji 9.

Mhe. Okash ameendelea kwa kuwaasa Wafugaji na Wakulima wa Bagamoyo na Chalinze kutumia Ardhi hiyo vizuri hasa katika shughuli za ufugaji na Kilimo cha kisasa pamoja na shughuli za kijamii.