Hesabu za Mwisho Kuidhinishwa na Baraza la Madiwani Chalinze

Imewekwa: September 30th, 2022

Baraza la Madiwani la Halmashauri ya Wilaya ya Chalinze likiongozwa na Mheshimiwa Hassani Mwinyikondo kwa kauli moja limejadili na kuipitisha taarifa ya Hesabu za Mwisho za Halmashauri (Final Accounts)kwa mwaka wa fedha 2021/2022.

Baraza hilo limeketi jana katika Ukumbi wa Halmashauri wa Jakaya Kikwete,katika Mkutano huo madiwani wameruhusu mchakato wa ufungaji wa ripoti ya Hesabu za Mwisho za Halmashauri kwa mwaka wa fedha 2021/2022 zinazoishia Juni 30,2022 uendelee kwa ajili ya kuwasilisha katika Ofisi ya Ukaguzi Taifa.

Halmashauri ya wilaya ya Chalinze imeandaa Hesabu zake kwa weledi wa hali ya juu kwa kuzingatia viwango vya kimataifa kwa Hesabu za sekta ya Umma na kwa kuzingatia miongozo mbalimbali inayotolewa na OR-TAMISEMI, Waraka namba 1 wa Wizara ya Fedha na Mipango wa uandaaji Hesabu za Mwisho kwa husika huku pia taarifa hizo zikisomeka katika mfumo wa ulipaji serikalini (Muse).

Akisoma taarifa hiyo ya Hesabu za Mwisho Mkurugenzi Mtendaji wa Halmashauri ya Chalinze Bwana Ramadhani Possi aliweza kubainisha hali halisi ya Hesabu za Mwisho kwa kuonyesha Thamani ya mali za Halmashauri zinazofikia Fedha za kitanzania Bilioni78.1 sawa na ongezeko la asilimia 9.1 ukilinganisha na thamani ya mali za Halmashauri kwa mwaka wa fedha 2020/2021 ambapo ilikuwa fedha za kitanzania Bilioni 71.6.

Kwa upande wake Mwenyekiti wa Halmashauri ya Chalinze,Hassan Mwinyikondo aliwaomba wajumbe wa Mkutano huo kubariki taarifa hiyo kwani yote yaliyotekelezwa katika ripoti hiyo Madiwani ni mashahidi wa kwanza.