Hospitali ya Wilaya Chalinze yakabidhiwa gari la kubebea wagonjwa

Imewekwa: July 28th, 2022

Naibu Waziri wa Ardhi ,nyumba na maendeleo ya makazi ambaye pia ni Mbunge wa Jimbo la Chalinze Mhe.Ridhiwani Kikwete hii leo tarehe 27 amekabidhi gari moja la kubebea Wagonjwa (Ambulance) katika Hospitali ya Wilaya ya Chalinze kwa lengo la kutoa huduma za dharura.

Akizungumza na waandishi wa Habari mara baada ya kukabidhi gari hilo Mhe. Ridhiwani ameishukuru Serikali ya Jamhuri ya Jamhuri ya Muungano wa Tanzania kwa kuipatia Halmashauri ya Wilaya ya Chalinze huduma za majengo na huduma za dharura kwa upande wa afya.

“Naishukuru sana Serikali yetu ya Tanzania inayoongozwa na Mhe. Samia Suluhu Hassan kwa kutupatia huduma hizi za majengo,magari na huduma za dharura ambapo kwa mwaka wa fedha huu Serikali imepanga kuleta magari matatu ambapo gari la kwanza ndio hili limeshatangulia lakini magari mawili yanakuja ambapo gari moja litakuja katika hospitali ya Wilaya na moja litakwenda Kituo cha Afya Msata na pia hii ni alama kuwa serikali inahakikisha huduma inawafikia wanachi.” Amesema Mhe. Ridhiwani

Aidha Mhe. Ridhiwani Kikwete ameupongeza uongozi wa Halmashauri ya Wilaya ya Chalinze kwa ushirikiano na umoja wao unaopelekea kufanya mambo makubwa ikiwemo kupata magari ,majengo na huduma za afya ili kuweza kuwahudumia wananchi wa Chalinze.

Pamoja na hayo Mheshimiwa Naibu Waziri amewataka wahudumu wa magari ya wagonjwa kuendelea kuyatunza magari hayo ili yaweze kudumu ili kuendelea kutoa huduma kwa wananchi.

Nae Mwenyekiti wa Halmashauri ya Wilaya ya Chalinze Mhe. Hassan Mwinyikondo amesema kuwa maendeleo ya Chalinze ni pamoja na utayari wao pamoja na ushirikiano na umoja wanauonesha baina yao katika kulenga kuwahudumia  wananchi na wakazi wa Halmashauri ya Wilaya ya Chalinze.

“Kwanza nimpongeze Rais wetu Mhe Samia Suluhu Hassan kwa huduma hizi anazotupatia na hii yote ni kwasababu ya sisi wenyewe kuwa tayari kuhudumiwa lakini pia maendeleo ya Chalinze mpaka kufikia hii leo ni Ushirikiano baina ya Ofisi ya Mkuu wa Wilaya,Mbunge,Mkurugenzi pamoja na Madiwani kwa kulenga kuwahudumia wana Chalinze”.