Kaimu Mkurugenzi TAMISEMI Afungua mafunzo ya wakuu wa Idara na Vitengo Shule ya Uongozi Mwalimu Nyerere

Imewekwa: October 13th, 2025

Kaimu Mkurugenzi wa Sera na Mipango kutoka Ofisi ya Rais, Tawala za Mikoa na Serikali za Mitaa (TAMISEMI), Bi. Lemi Shumbusho, leo amefungua rasmi mafunzo ya kuwajengea uwezo Wakuu wa Idara na Vitengo wa Halmashauri ya Wilaya ya Chalinze. Mafunzo hayo yanafanyika katika Shule ya Uongozi ya Mwalimu Julius Nyerere iliyopo Kibaha mkoani Pwani.

Akizungumza wakati wa ufunguzi, Bi. Shumbusho aliipongeza Halmashauri ya Wilaya ya Chalinze kwa hatua ya kuandaa mafunzo hayo muhimu kwa viongozi wake. Alisema hatua hiyo inaonesha dhamira ya dhati ya uongozi wa halmashauri katika kuhakikisha watumishi wake wanakuwa na ujuzi na maarifa ya kiuongozi yanayolenga kuongeza tija na ufanisi katika utendaji kazi wa kila siku.

Aidha, Bi. Shumbusho alisisitiza kuwa uongozi wa halmashauri una jukumu kubwa la kuhakikisha mafunzo haya yanakuwa chachu ya mabadiliko chanya katika utoaji wa huduma kwa wananchi. Aliongeza kuwa viongozi waliopewa dhamana wanapaswa kuzingatia sheria, taratibu na kanuni za nchi ili kuepuka changamoto zinazoweza kuathiri utekelezaji wa majukumu yao ya kitaifa.

Katika hotuba yake, Kaimu Mkurugenzi huyo alitoa pongezi maalum kwa Mkurugenzi Mtendaji wa Halmashauri ya Wilaya ya Chalinze, Bw. Ramadhani Possi, kwa ubunifu na maono ya kupanga na kutekeleza mpango wa mafunzo haya. Alisema hatua hiyo ni mfano wa kuigwa na halmashauri nyingine nchini ambazo zinapaswa kuwekeza katika mafunzo ya watumishi wake ili kuongeza ufanisi wa taasisi zao.

Bi. Shumbusho aliwataka Wakuu wa Idara na Vitengo kutumia vyema fursa waliyoipata kwa kujifunza, kubadilishana uzoefu, na kuimarisha uwezo wao wa kiuongozi. Alisisitiza kuwa maarifa yatakayopatikana kupitia mafunzo hayo yanapaswa kutafsiriwa katika matokeo chanya kwa wananchi wa Chalinze na taifa kwa ujumla.

Mafunzo hayo yanatarajiwa kudumu kwa siku kadhaa yakihusisha masuala ya uongozi, usimamizi wa rasilimali watu, mipango na bajeti, pamoja na uwajibikaji katika sekta ya umma. Kupitia mafunzo hayo, Halmashauri ya Chalinze inalenga kujenga timu imara yenye uwezo wa kusimamia maendeleo endelevu na kutoa huduma bora kwa wananchi.