Kamati Tendaji ya Baraza la Wafanyakazi yakutana Chalinze

Imewekwa: January 20th, 2025

Kamati Tendaji ya Baraza la wafanyakazi wa halmashauri ya wilaya ya Chalinze imekutana leo hii katika ukumbi wa masafa ikiongozwa na Mwenyekiti wa Baraza hilo,Mkurugenzi Mtendaji wa halmashauri ya wilaya ya Chalinze,Bwana Ramadhani Possi.

Katika kikao hicho kilichohudhuriwa na viongozi wa vyama vya wafanyakazi kwa maana ya makatibu wa vyama hivyo ngazi ya wilaya na Mkoa. Kikao hicho kimefanyika kabla ya Kikao cha Baraza la wafanyakazi ambalo kwa mujibu wa sheria za kazi kamati tendaji hukutana kabla ya Baraza la wafanyakazi.

Kamati hiyo imejadili  na kufanya mapitio ya bajeti kwa mwaka wa fedha unaotekelezwa kwa sasa na kamati kuona utekelezaji wa bajeti hizo hususan stahiki za watumishi kama likizo,uhamisho,matibabu,sare na kupandishwa vyeo kwa mujibu wa sheria na kwa wakati.

Kwa upande wake Mkuu wa Divisheni ya Utawala na Utumishi,Bwana Archanus Kilaja alitoa ufafanuzi kutokana na hoja zilizoibuliwa na wajumbe wa kamati tendaji,ikiwa ni pamoja na zawadi za watumishi hodari kuwa malipo hayo yako tayari na watumishi husika watapata fedha zao kwani ziko tayari.

Kwa upande wake Katibu wa Chama cha Walimu wilaya ya Bagamoyo, akichangia hoja katika kuboresha utendaji kazi wa watumishi alitoa ushauri inapobidi mtumishi anahamishwa mwajiri aangalie mazingira ya mtumishi kiutendaji na umbali kutoka mahali alipokuwa awali na kule anakokwenda . Pia mwajiri afanye uhamisho pale mwajiri anapokuwa na fedha.

Naye Mwenyekiti wa Chama cha Walimu wilaya ya Bagamoyo, Mwl. Hamis Kimeza ameitaka kamati kutowahamisha watumishi kama hakuna fedha ya kuwalipa ili kuboresha utendaji kazi na kupunguza kero na usumbufu usiokuwa wa lazima kwa watumishi na mwajiri.