Kamati ya Afya ya Msingi yaweka Mikakati ya Mapambano dhidi ya Polio

Imewekwa: April 28th, 2022

Kamati ya afya ya msingi ya halmashauri ya chalinze imefanya kikao juu ya kampeni ya Chanjo ya Polio kwa watoto chini ya miaka mitano ambapo kikao hicho kimeongozwa na Mwenyekiti wake Katibu Tawala wa Wilaya ya Bagamoyo Bi.Kasilida Mgeni kwaniaba ya Mheshimiwa Mkuu wa Wilaya ya Bagamoyo.

Katika hotuba ya Mwenyekiti wa kikao hicho Bi. Kasilida Mgeni aliwaelezea washiriki wa kikao kuwa lengo la Chanjo hiyo ya Polio ni kuweza kuchukua tahadhari za haraka na kuzuia ugonjwa huo usiingie nchini kwani tayari Serikali ya Malawi mnamo tarehe 17 Februari, 2022  ilitoa tamko la kuwepo kwa mlipuko wa ugonjwa huo wa polio, hivyo basi ni kawaida wizara ya Afya kufuatilia kwa ukaribu taarifa za magonjwa ya mlipuko yanayozuilika katika nchi jirani kama vile Surua, Rubella na Polio ili kuweza kuchukua tahadhari za haraka na kuzuia magonjwa hayo yasiingie nchini kutokana na mwingiliano wa watu katika shughuli za kibiashara au kijamii.

Aidha Bi.Kasilida Mgeni aliwataka Washiriki na wajumbe wa kikao hicho kujipanga na kuwa  mabalozi wazuri kuhusu zoezi la chanjo ya polio kwa watoto chini ya miaka mitano na kutoa onyo kwa wote wanaopotosha zoezi hilo la chanjo kuacha mara moja.

“Niwaombe washiriki wote katika kikao hiki tutoke na mikakati madhubuti itakayolenga kuwafikia Watoto wote chini ya miaka mitano kupata chanjo na kufikia malengo zaidi na mkawe mabalozi wazuri kwenye jamii zenu na makundi yenu ili zoezi hili la chanjo ya polio liweze kufahamika na kueleweka vizuri kwa wananchi na niwaombe wakati wa uratibu wa zoezi hili kuangalia makundi maalumu nao waweze kupata haki yao ya msingi pia nitoe onyo kwa wote wanaopotosha juu ya zoezi hili kuacha mara moja kwani hakuna manufaa yoyote wanapofanya hivyo” Alisema Bi. Kasilida.

Nae mganga mkuu wa Wilaya Dkt.Allen Mlekwa alielezea ni kwa namna gani ugonjwa wa polio unaweza kuambukiwa pamoja na maadhara ya ugonjwa huo.

“Ugonjwa wa Polio unasababishwa na kirusi cha Polio ambacho huambukizwa kutoka kwa mtu alieathirika kwenda kwa mwingine kwa kunywa au kula chakula au kinywaji kilichochafuliwa na kinyesi chenye vimelea vya ugonjwa wa Polio na Virusi hivyo huzaliana katika utumbo na huweza kuathiri mfumo wa fahamu ikiwa ni pamoja na kupooza kwa ghafla kwa viungo ndani ya masaa machache hata kupelekea kifo na ugonjwa huu huathiri zaidi Watoto chini ya miaka kumi na mitano na ugonjwa huu hauna tiba, njia kuu ya kuzuia ugonjwa huu ni kwa kuwapatia Watoto chanjo ya Polio iliyotengenezwa maalum kukinga ugonjwa huu ” Alisema Dkt.Mlekwa.

Kwa upande wa mratibu wa zoezi hili Halmashauri ya Chalinze Bw.Aidano Mbulinyingi ametoa maelezo ni kwa namana gani zoezi hili la kampeni ya kutoa chanjo ya polio litafanyika katika ngazi ya Halmashauri

Kampeni hii imelenga kutoa huduma kwa jumla ya walengwa 42365 ambao ni watoto wa miezi 0-59 na itafanyika kwa utaratibu wa kutoa Chanjo Majumbani (nyumba kwa nyumba), kwenye vituo vya kutolea huduma za afya na kliniki tembezi kwenye maneo maalum (Stendi, Sokoni, Machimboni)”Alisema Bw.Mbulinyingi.

Kikao hicho cha kampeni ya Chanjo kimehudhuriwa na Wakuu wa vyombo vya ulinzi na usalama,Katibu Tawala wilaya, Mganga Mkuu wa Wilaya, Wajumbe wa timu za uendeshaji wa huduma za Afya wa Wilaya,Viongozi wa Madhehebu ya Dini,Wawakilishi wa vyama vya kisiasa, na Wajumbe wote wa Kamati ya Afya ya Msingi ya Wilaya.