Kamati ya Fedha,Uongozi na Mipango yafanya ziara kukagua miradi ya maendeleo

Imewekwa: May 6th, 2025

Kamati ya Fedha, Uongozi na Mipango ya Halmashauri ya Wilaya ya Chalinze, ikiongozwa na Mwenyekiti wa Halmashauri hiyo Mheshimiwa Hassani Mwinyikondo, imefanya ziara leo kukagua miradi ya maendeleo inayotekelezwa katika robo ya tatu ya mwaka wa fedha 2024/2025. Ziara hiyo imelenga kuhakikisha utekelezaji wa miradi unaenda sambamba na mipango ya maendeleo ya halmashauri pamoja na matumizi sahihi ya rasilimali.

Miongoni mwa maeneo yaliyotembelewa ni pamoja na kiwanja kilichokuwa na nyumba ya mtumishi wa maliasili katika eneo la Maisha Plus. Kamati hiyo ilikikagua kiwanja hicho na kufanikiwa kubaini mipaka yake. Wajumbe walielekeza ofisi ya ardhi kuhakikisha eneo hilo linapimwa rasmi na kuandaliwa hati ya umiliki, ili kukifanya kuwa salama na rasmi kwa matumizi ya serikali.

Katika ziara hiyo, kamati pia ilitembelea soko la Bwilingu na kujionea maendeleo yake pamoja na changamoto zilizopo. Wajumbe walibaini kuwa kumekuwa na upungufu wa wafanyabiashara ndani ya soko hilo huku vibanda vingi vikibaki wazi. Hali hiyo imechangia kupungua kwa mapato ya ushuru wa soko jambo linaloathiri mapato ya halmashauri.

Baada ya tathmini ya hali hiyo, kamati imetoa maelekezo kwa idara husika kuhakikisha wafanyabiashara wote wanaofanya biashara nje ya soko wanaelekezwa kurudi ndani ya soko hilo. Hatua hiyo inalenga kuongeza mapato ya halmashauri na kuhakikisha matumizi bora ya miundombinu iliyowekezwa kwa ajili ya maendeleo ya wananchi.