Kamati ya Mikopo ya Halmashauri yaketi kujadili maombi ya mikopo ya makundi maalum

Imewekwa: January 30th, 2026

Na John Mlyambate

Kamati ya Mikopo ya Halmashauri ya Wilaya ya Chalinze imeketi leo hii kujadili maombi mbalimbali ya mikopo yaliyowasilishwa na vikundi vya wajasiriamali vinavyotokana na makundi maalum, yakiwemo Vijana, Wanawake na Watu Wenye Ulemavu, kutoka kata tofauti ndani ya Halmashauri hiyo.

Katika kikao hicho, kamati ilipitia kwa kina na kujadili maandiko ya miradi ya wajasiriamali, ikilenga kutathmini ubora, uhalisia na uendelevu wa miradi iliyopendekezwa. Baada ya majadiliano, kamati imeidhinisha mapendekezo ya miradi iliyokidhi vigezo kwa ajili ya kupelekwa kwenye Menejimenti ya Halmashauri kwa hatua zaidi za maamuzi na utekelezaji.

Mikopo hiyo inatokana na asilimia 10 ya mapato ya ndani ya Halmashauri ya Wilaya ya Chalinze, inayotengwa mahsusi kwa ajili ya kuwawezesha kiuchumi wananchi wa makundi maalum, kwa lengo la kukuza ajira, kuongeza kipato na kuinua uchumi wa kaya pamoja na maendeleo ya jamii kwa ujumla.

Halmashauri ya Wilaya ya Chalinze inaendelea kusisitiza uwazi, usawa na uwajibikaji katika mchakato wa utoaji wa mikopo hiyo, huku ikihimiza vikundi vya wajasiriamali kuandaa miradi yenye tija, inayotekelezeka na yenye kuzingatia miongozo iliyowekwa ili kuhakikisha mikopo hiyo inaleta matokeo chanya kwa walengwa na Taifa kwa ujumla.