Kamati ya Siasa yafurahishwa na utekelezaji wa miradi ya Maendeleo Chalinze

Imewekwa: September 18th, 2023

Kamati ya siasa ya Chama cha Mapinduzi wilaya ya Bagamoyo Mkoani Pwani  imeridhishwa na utekelezaji wa Miradi ya Maendeleo katika Halmashauri ya wilaya ya Chalinze,Kamati hiyo ikiongozwa na Mwenyekiti wa CCM wilaya ya Bagamoyo Mheshimiwa Abdulsharrif Zahoro imefanya ukaguzi wa Miradi mbalimbali ya maendeleo leo hii katika sekta za afya ,elimu na maendeleo ya Jamii katika kata za Bwilingu,Msoga,Lugoba na Mbwewe.

Wakikagua miradi hiyo wajumbe wa kamati ya siasa wilaya ya Bagamoyo waliweza kukagua ujenzi wa soko la kisasa la Bwilingu na kuweza kujionea ubora wa soko hilo kwa jinsi lilivyojengwa katika viwango vinavyotakiwa kwa kuzingatia thamani halisi ya mradi na fedha zilizotumika yaani” Value for Money.” Soko hilo limejengwa kwa fedha za mapato ya ndani ya Halmashauri.

Hali kadhalika kamati ya siasa ilitembelea shule ya msingi Chalinze na kuweza kukagua ujenzi wa Bweni la watoto wavulana wenye mahitaji maalum na uzio wa Bweni hilo,wajumbe wa kamati hiyo waliweza kutoa ushauri wao juu kukamilisha bweni hilo kwa kuweka vitanda ili liweze kutumiwa na wanafunzi, akijibu hoja hiyo Mkurugenzi Mtendaji wa Halmashauri ya Chalinze Bwana Ramadhani Possi aliihakikishia kamati kuwa halmashauri imetenga fedha kwa ajili ukamilishaji wa bweni hilo sanjari na kununua vitanda.

Kamati ya siasa iliweza kufika katika Hospitali ya wilaya ya Chalinze ijulikanayo kama Msoga na kuona ujenzi wa Kituo cha Dharura cha Matibabu kilichojengwa katika Hospitali ya Msoga na kinaendelea kufanya kazi na wananchi wanaendelea kunufaika na huduma hiyo. Mwenyekiti wa CCM wilaya ya Bagamoyo Mheshimiwa Zahoro aliishukuru serikali ya awamu ya sita chini ya Rais Samia Suluhu Hassan kwa jinsi inavyotekeleza Ilani ya Chama cha Mapinduzi kwa kuboresha Huduma za Afya na kutoa huduma zenye viwango na kuimarisha afya za wananchi.

Kamati ya siasa ilifurahishwa na ujenzi wa shule mpya ya sekondari inayojengwa katika kata ya Mbwewe kwa fedha kutoka serikali kuu. Halmashauri ya Chalinze ilipokea jumla ya fedha za kitanzania Milioni 528 kwa ajili ya ujenzi wa shule hiyo na ujenzi unaendelea,kamati imewataka wasimamizi wa mradi kusimamia kwa weledi na uaminifu ili kukamilisha mradi huo kwa wakati.

Hata hivyo kamati ya siasa wilaya ya Bagamoyo,pamoja na miradi hiyo imeupongeza uongozi wa Halmashauri ya Chalinze kwa maana ya Baraza la madiwani na Menejimenti ya Halmashauri kwa usimamizi bora wa miradi ya maendeleo sanjari na ubunifu wa miradi mingi inayotekelezwa kwa mapato ya ndani ya Halmashauri, kama mradi wa kufyatua matofali unaendelea kusimikwa katika kijiji cha Lugoba kata ya Lugoba. Mradi huo utatumika kurahisisha utekelezaji wa miradi mbalimbali ya maendeleo katika halmashauri kwani miradi hiyo itakuwa na ubora kutokana na ubora wa tofali zitakazo zalishwa na kiwanda cha halmashauri.

Naye Mkuu wa wilaya ya Bagamoyo, Mheshimiwa Halima Okash ambaye pia ni mjumbe wa kamati ya Siasa wilaya aliipongeza Halmashauri ya wilaya ya Chalinze kwa utekelezaji bora wa miradi ya maendeleo katika sekta za Afya,Elimu na mingineyo na kumshukuru Dkt Samia Suluhu Hassan kwa kuijali halmadhauri ya Chalinze kuipatia fedha nyingi kwa misingi ya kutekeleza miradi mbalimbali ya maendeleo ili kutatua kero za wananchi kama ilivyo ahidiwa katika Ilani ya Chama cha Mapinduzi 2020-2025.