Kamati ya Uchumi,Ujenzi na Mazingira yakagua Miradi yenye Thamani ya Milioni 34

Imewekwa: August 16th, 2018

Kamati ya Uchumi,Ujenzi na Mazingira ya halmashauri ya Chalinze imefanya ziara ya kukamilisha robo ya nne kwa kukagua miradi ya maendeleo iliyowezeshwa na fedha zitokanazo na mapato ya ndani ya halmashauri yenye thamani ya fedha za kitanzania milioni 34 katika vijiji vya kata za Miono na Mkange hivi karibuni.

Katika ziara hiyo kamati ilikagua shughuli za vijana wajasiriamali wa kikundi cha Genge la Vijana kilichopo katika kijiji cha Miono,kikundi hiki kiliwezeshwa na halmashauri ya wilaya ya Chalinze kwa kupewa mkopo wa Tsh 5,000,000/= ikiwa ni fedha iliyotokana na mapato ya ndani ya halmashauri kwa mujibu wa sheria ya fedha inayotaka kila halmashauri inatakiwa kutenga asilimia 10 ya mapato ya ndani kuwakopesha vijana,wanawake na watoto.

Aidha kamati ilikagua na kuona ujenzi wa Zahanati inayojengwa kwa ufadhili wa TANAPA na ujenzi wa nyumba ya mganga wa zahanati inayojengwa na halmashauri kwa mapato ya ndani na mpaka sasa halmashauri imekwisha peleka jumla ya fedha za kitanzania milioni 29 kwa kazi hiyo.

Kwa mujibu wa Katibu wa kikundi cha vijana ,Bwana Mtaula Idd alipokuwa akitoa taarifa ya mradi kwa waajumbe wa kamati aliishukuru halmashauri ya chalinze kwa jinsi inavyowawezesha vijana katika kujikwamua kiuchumi na kueleza kazi za ujasiriamali wanazozifanya baada ya kupata mkopo wamefungua Mgahawa unaofanya kazi,wamenunua”Pull table” ambayo inafanya kazi ya kuzalisha fedha pia aliongezea kwa kusema pia wana duka la vifaa vya maofisini(stationary) na wanaendelea na biashara kama kawaida.”Kutokana na shughuli hizi tunauhakika wa kuanza kufanya marejesho ya mkopo huu mapema mwezi Septemba.”Idd alisema.

Kwa upande wake Mwenyekiti wa Kamati,ambaye ni Diwani wa kata ya Msoga,Mheshimiwa Hasani Mwinyikondo aliwapongeza vijana wa kikundi cha Genge la Vijana Miono kwa jinsi wanavyojishughulisha na ujasiriamali na kuwataka vijana wa maeneo mengine ndani ya halmashauri ya Chalinze kuiga mazuri ya vijana wa Miono na kuitumia mikopo inayotolewa na halmashauri kwa weledi wa hali ya juu ili iwe na tija lakini pia kufikia azima ya serikali katika kuyakwamua makundi maalum kiuchumi.

Hata hivyo katika kuwawezesha vijana,wanawake na walemavu halmashauri ya Chalinze imeweza kuwakopesha walengwa fedha zote zilizotengwa katika bajeti husika kwa asilimia 100.”Kwa mwaka huu tunategemea kufanya vizuri zaidi katika kuwawezesha vijana,wanawake na walemavu il waweze kujikwamua kiuchumi.”Mwinyikondo alisema.