Kampeni ya Msaada wa Kisheria ya Mama Samia yawafikia Wananchi wa Mkange

Imewekwa: February 27th, 2025

Kampeni ya Msaada wa Kisheria imewafikia wananchi wa Kata ya Mkange katika Halmashauri ya Wilaya ya Chalinze, ikiongozwa na Mratibu wa kampeni hiyo, Wakili Asia Festus kutoka Wizara ya Sheria na Katiba. Kampeni hiyo inalenga kutoa elimu ya sheria kwa wananchi na kuwawezesha kuelewa haki zao za kisheria katika masuala mbalimbali.

Kampeni hiyo ilianza kwa kutoa elimu ya sheria kwa wanafunzi wa Shule ya Msingi Mkange, ambapo walifundishwa mbinu mbalimbali za kupambana na ukatili wa kijinsia na haki zao za msingi kwa mujibu wa Sheria ya Mtoto ya mwaka 2009. Mafunzo hayo yalilenga kuwajengea uwezo wa kujitambua na kujilinda dhidi ya vitendo vya ukatili vinavyoweza kuwakumba.

Akitoa elimu hiyo kwa wanafunzi, Afisa Ustawi wa Jamii wa Halmashauri ya Wilaya ya Chalinze, Bi. Atuganile Chisunga, aliwaelimisha kuhusu namna ya kutambua na kuchukua hatua dhidi ya vitendo vya ukatili. Aliwasihi wanafunzi kutoa taarifa kwa walimu wao, maafisa ustawi wa jamii, maafisa watendaji wa vijiji au mitaa, au mtu yeyote wanayemwamini wanapokumbana na viashiria vya ukatili.

Kwa upande wake, Mwanasheria Bw. John Mlyambate alitoa elimu kwa wananchi wa Kijiji cha Mkange kuhusu sheria za mirathi na wosia. Aliwahimiza wananchi kuzingatia sheria hizo katika mgawanyo wa mali za marehemu ili kuepusha migogoro ya kifamilia na kijamii.

Wakili Philimon Mganga alieleza kwa kina kuhusu sheria za ndoa na mgawanyo wa mali za wanandoa pindi wanapotalikiana kwa mujibu wa sheria. Aliwataka wananchi wa Mkange kutumia msaada wa kisheria kutoka kwa wasaidizi wa sheria wanapokumbana na migogoro ya ndoa ili kuhakikisha haki zao zinalindwa.

Naye Afisa Ardhi wa Halmashauri ya Wilaya ya Chalinze, Bw. Bartazari Mmiti, alitoa elimu kuhusu umiliki wa ardhi na aina za ardhi kwa mujibu wa sheria za Tanzania. Alisisitiza umuhimu wa wananchi kufuata taratibu za kisheria katika umiliki wa ardhi ili kuepusha migogoro ya ardhi katika jamii.

Wananchi wa Mkange walionesha shukrani kwa kampeni hiyo, wakisema kuwa imewapa uelewa mpana wa masuala muhimu ya kisheria yanayogusa maisha yao ya kila siku. Waliomba kampeni kama hizi ziendelee kufanyika mara kwa mara ili kuwafikia wananchi wengi zaidi, hususan walioko maeneo ya vijijini ambako elimu ya sheria ni adimu.