Katibu Mkuu afanya kikao na Watumishi wa Halmashauri ya Chalinze

Imewekwa: November 16th, 2022

                               Na John Mlyambate 

Katibu Mkuu wa Nchi Ofisi ya Rais Tawala za Mikoa na Serikali za Mitaa Profesa Riziki Shemdoe leo amefanya ziara katika Halmashauri ya Wilaya ya Chalinze na kupokea taarifa ya utekelezaji wa miradi mbalimbali ya Maendeleo katika Halmashauri hiyo kutoka kwa Mkurugenzi Mtendaji wa Halmashauri ya wilaya ya Chalinze Ndugu Ramadhani Possi.

Amepokea taarifa ya Ujenzi wa madarasa ya wanafunzi watakaoanza masomo yao ya kidato cha kwanza mwaka 2023,Ujenzi wa madarasa hayo ni kutokana na fedha zilizotolewa na Serikali ya awamu ya sita chini ya Rais Samia Suluhu Hassan jumla ya fedha za kitanzania Bilioni 1.2. Ambazo zinaendelea kutumika katika ujenzi wa jumla ya vyumba vya madarasa 60.

Katibu Mkuu amepokea taarifa ya Ujenzi wa miundombinu ya afya katika Hospitali ya Halmashauri ya Msoga na vituo vya afya vinavyoendelea kujengwa kutokana na fedha zinazoletwa na Serikali.

Katibu Mkuu baada ya kupokea taarifa ya utekelezaji kutoka kwa Mkurugenzi Mtendaji alifanya kikao na Watumishi wote wa Halmashauri ya wilaya ya Chalinze katika Ukumbi wa Mikutano wa Jakaya Kikwete,katika kikao hicho Katibu Mkuu alizungumza na Watumishi na kuwapongeza  kwa utendaji kazi uliotukuka kwa usimamizi mzuri wa miradi ya Maendeleo,ukusanyaji mapato na utoaji huduma kwa wananchi ambao ndiyo waajiri wakuu.

Profesa Shemdoe aliwapongeza watumishi wote wanaomsaidia katika kutekeleza Majukumu mbalimbali kwa niaba yake kuanzia Katibu Tawala wa Mkoa,Wakurugenzi wote wa Mkoa wa Pwani ,Wakuu wa Idara na Vitengo na Watumishi wote ndani ya Mamlaka za Serikali za Mitaa kwa nafasi zao na kuwataka Watumishi kuwa na ushirikiano na upendo katika maeneo ya kazi kwani mahali pa kazi ni mahali ambapo Watumishi wanatumia muda mwingi katika maisha.

“ Nisingependa kuona Watumishi wanakuwa watu wakutafutiana makosa na kuharibiana kazi kwa majungu si kitu kizuri,tulipo hapa kama Watumishi tumebeba dhamana na mizigo ya watu wengi nyuma yetu wanaotegemea kuishi kutokana na ajira tulizonazo,hivyo nawasihi tupendane na kuelekezana pasipo kuumizana.” Katibu Mkuu alisema.

Katibu Mkuu alimalizia kwa kuwataka Watumishi wafanye kazi kama timu kwa kushirikiana na Madiwani kwani bila Menejimenti ya Halmashauri imara na Madiwani imara hakuna Halmashauri,hivyo aliitaka Menejimenti ya Halmashauri kufanya kazi yake kwa weledi ili Halmashauri iweze kusonga mbele na hatimaye kuweza kutenda haki kwa wananchi kwa kuwaletea huduma muhimu za kijamii kama Elimu,Afya,Maji na nishati ya umeme.