Katibu wa Chama Cha Mapinduzi (CCM) Wilaya ya Bagamoyo, Ndugu Shabani Hamisi Karage atangaza Matokeo ya uchaguzi wa nafasi ya Mwenyekiti wa Halmashauri Chalinze

Imewekwa: December 1st, 2025

Katibu wa Chama Cha Mapinduzi (CCM) Wilaya ya Bagamoyo, Shabani Hamisi Karage, leo Desemba 1,2025  ametangaza matokeo ya uchaguzi wa nafasi ya Uenyekiti wa Halmashauri ya Chalinze ambapo Ndugu Leon Lucas Mgweno ameshinda kwa kupata kura 14 kati ya kura 20 zilizopigwa.

Mgweno amemshinda mpinzani wake, Ndugu Juma Rajabu Gurumo, aliyepata kura 6 katika uchaguzi huo uliofanyika katika ukumbi mdogo wa Halmashauri ya Chalinze. Uchaguzi huo umefanyika kwa mujibu wa taratibu za chama na kanuni za uchaguzi za CCM.

Kwa mujibu wa Katibu Karage, hatua inayofuata ni mwenyekiti huyo kupigiwa kura katika baraza jipya la madiwani ili kuthibitishwa rasmi na kuanza kutekeleza majukumu yake kwa mujibu wa Ilani ya Chama Cha Mapinduzi.

Uongozi wa CCM Wilaya ya Bagamoyo umepongeza utaratibu mzima wa uchaguzi huo na kuwataka viongozi wote wa chama kuendelea kushirikiana katika kutekeleza mipango na malengo ya maendeleo ya Chalinze.