Keki ya Wahitimu kutekeleza dhana ya Shule Bora Msoga

Imewekwa: November 4th, 2022

Keki ya wahitimu iliyoandaliwa na Diwani wa kata ya Msoga na Mwenyekiti wa Halmashauri ya wilaya ya Chalinze,Hassani Mwinyikondo katika mahafali ya darasa la saba katika shule ya msingi Msoga, imeweza kukatwa na kuliwa na wageni waalikwa huku wakichangia fedha kwa ajili ya chakula cha mchana kwa wanafunzi wanaoendelea na masomo shuleni hapo.

Akikata keki hiyo Mgeni rasmi katika mahafali hiyo Bwana Ramadhani Possi ambaye pia ni Mkurugenzi Mtendaji wa Halmashauri ya Chalinze. Aliwahamasisha wazazi na wageni waalikwa kuchangia gharama za upatikanaji wa chakula cha mchana kwa wanafunzi wanaoendelea na masomo ili kuweza kuongeza kiwango cha ufaulu lakini pia kuitekeleza kwa vitendo dhana ya “Shule Bora.”katika halmashauri ya Chalinze.

“Shule Bora ni shule iliyo na miundombinu stahiki yote katika tendo la kujifunza na kufundisha sanjari na upatikanaji wa chakula cha mchana katika shule zetu.” Possi alisisitiza.

Kwa upande wake Diwani wa kata ya Msoga, Hassani Mwinyikondo alimpongeza Mkurugenzi Possi ambaye ni mgeni rasmi kwa kuhamasisha upatikanaji wa Chakula cha mchana kwa wanafunzi wanaoendelea na masomo na kuwaomba wananchi kuwa na utamaduni wa kuchangia chakula cha mchana kwa wanafunzi katika kila mahafali ndani ya halmashauri ya Chalinze kwa misingi ya kutekeleza dhana ya shule bora kwa vitendo.

Katika mahafali hiyo wazazi na wageni waalikwa walilishana keki huku wakichangia fedha ya Chakula. Kila aliyekula keki hiyo alichangia kiasi cha fedha kulingana na uwezo wake.Zaidi ya fedha za kitanzania milioni moja zimeweza kupatikana katika mahafali hiyo.